Koalicioni VLEN ka njoftuar se një nga projektet më të rëndësishme infrastrukturore për shqiptarët në Maqedoninë e Veriut, korridori Shkup–Bllacë, po hyn në fazën përfundimtare të realizimit. Në anën tjetër BDI në opozitë shpreh shqetësim për vonesa dhe sabotime të qëllimshme ndaj projektit.
Një ndër rrugët më të shumëpritura për shqiptarët, korridori jetik që lidh Shkupin me kufirin e Bllacës, po hyn në fazën e saj përfundimtare, paralajmëron përmes një deklarate me shkrim koalicioni VLEN.
Me hyrjen e VLEN në Qeveri, projekti ka marrë udhë dhe vullneti për punë po jep frytet e para.
“VLEN nuk premton për kamerë, VLEN vepron në terren,” thuhet në njoftimin e VLEN-it.
Partitë shqiptare që janë pjesë e qeverisë informojnë se Ndërmarrja Publike “Rrugët Shtetërore” ka hapur procedurat për prokurim publik për fazën përgatitore të projektit final për ndërtimin e kësaj rruge, që për dekada ka mbetur vetëm premtim.
Nga ana tjetër, partia shqiptare në opozitë, Bashkimi Demokratik për Integrim, shpreh shqetësimin e thellë për sabotimin sistematik të projektit të Autostradës Shkup – Bllacë, një lidhje strategjike jo vetëm për shqiptarët, por për të gjithë rajonin dhe partneritetin tonë me Republikën e Kosovës.
Në reagimin me shkrim të BDI-së më tej thuhet se, “edhe pse më shumë se dy kilometrat e para janë përfunduar me sukses gjatë qeverisjes së kaluar, kjo Qeveri vazhdon të refuzojë hapjen e tyre për përdorim publik, fillimisht duke premtuar gjoja një ‘revizion teknik’, e tash duke deklaruar fillimin e një ‘procedure të re për prokurim publik’.
Ky është një skenar i njohur politik për të zvarritur dhe bllokuar qëllimisht projektet që janë iniciuar nga BDI,” thuhet mes tjerash në reagim.
