Prokuroria Themelore në Gjakovë ka ngritur aktakuzë kundër të pandehurve E. Xh. dhe K. Xh. për veprën penale “grabitje”.
Siç njofton Prokuroria, në fshatin Ratkoc të Rahovecit dy të pandehurit, duke i ndarë rolet bashkë me N.N. kanë hyrë në shtëpinë e të dëmtuarit M.M. me qëllim të grabitjes.
“Sipas pikës I të dispozitiv të aktakuzës ndër tjera cekët se më datë 23.02.2024, në fshatin Ratkoc, K. Rahovec, të pandehurit E.Xh., dhe K.Xh., të marrur vesh ndërmjet vete duke i ndarë edhe rolet bashkë dhe me N.N., persona me qëllim përfitimi të kundërligjshëm të dobisë pasurore për vete apo personin tjetër kanë shkuar rreth orës 03:00 në shtëpinë e të dëmtuarit M.M., hyjnë brenda, shkojnë tek dhoma e gjumit ku po flinte i njëjti, në atë mënyre të pandehurit të maskuar me përdorim të forcës dhe me kanosje serioze të armës automatike llojit AK-47, sulmojnë jetën dhe trupin e të dëmtuarit M.M., dhe bashkëshortes së tij N.M., ashtu që në atë mënyrë të dëmtuarit M.M., i kërkojnë para duke e goditur me mjete të forta në koke dhe trup dhe e godasin po ashtu të dëmtuarën N.M., duke ua marrë nga qafa me force zinxhirët e arit, ashtu që shkrepin një herë me armë dhe me të ikur nga aty ia marrin nga xhepi i setrës shumën prej 7.000 Euro”, thuhet në njoftim.
Po ashtu theksohet se me këto veprime të pandehurit E.Xh., dhe K.Xh., në bashkëkryerje kanë kryer veprën penale Grabitja.
“Sipas pikës II të dispozitivit të aktakuzës ndër tjera ceket se i pandehuri K.Xh., me datë të pacaktuar e deri më dt.23.02.2024, në kundërshtim me ligjin e zbatueshëm për armët në Kosovë, me nr. 05/L022, ka mbajtur armën e llojit AK-47”, thuhet tutje në njoftimin e kësaj prokurorie.
Prokuroria Themelore në Gjakovë ka bërë me dije se me këto veprime i pandehuri K.Xh., ka kryer veprën penale Mbajtja në pronësi, kontroll apo posedim i paautorizuar i armëve.
Prokurori i çështjes me rastin e ngritjes së aktakuzës, i ka propozuar gjykatës që të pandehurit të shpallën fajtore dhe të dënohen sipas ligjit për veprat penale të cilat iu vihen në barrë.
