Kreu i fuqishëm i një bande ekuadoriane, Adolfo Macías Villamar, është ekstraduar në Shtetet e Bashkuara për t’u përballur me akuzat për trafik droge dhe armësh.
I njohur si “Fito”, ai u rikap në qershor, pothuajse një vit pasi u arratis nga një burg i sigurisë së lartë ku po vuante një dënim me 34 vjet burg për një sërë krimesh.
“Ai do të paraqitet në gjykatën federale të SHBA-së të hënën, ku do të deklarohet i pafajshëm për akuzat për trafik ndërkombëtar droge dhe armësh”, tha avokati i tij për Reuters.
Macías ishte kreu i bandës Los Choneros, e cila ka lidhje me organizata të fuqishme kriminale nga Meksika dhe Ballkani. Ai dyshohet gjithashtu se ka urdhëruar vrasjen e kandidatit presidencial Fernando Villavicencio në vitin 2023.
Banda Los Choneros fajësohet për transformimin e Ekuadorit nga një parajsë turistike në një vend me një nga nivelet më të larta të vrasjeve në rajon.
Më shumë se 70% e sasisë totale të kokainës së prodhuar në botë kalon aktualisht nëpër portet ekuadoriane. Vendi ndodhet midis dy eksportuesve më të mëdhenj të kokainës në botë, Kolumbisë dhe Perusë.
Në qershor, policia e gjurmoi Macías në atë që e përshkruan si një bunker nëntokësor nën një shtëpi luksoze në qytetin e Mantës. Ai u dërgua në La Roca, një burg i sigurisë maksimale. Në atë kohë, presidenti i Ekuadorit, Daniel Noboa, vlerësoi forcat e sigurisë për arrestimin e tij dhe tha se ai do të ekstradohej në SHBA.
Autoritetet e burgjeve të atij vendi thanë se ai u nxor nga një burg në Ekuador më herët të dielën për t’u dorëzuar autoriteteve amerikane.
Ekuadorianët votuan për të lejuar ekstradimin e qytetarëve të tyre në një referendum të thirrur nga Presidenti Nobo, i cili ka premtuar të godasë krimin në rritje.
Në mars të këtij viti, Noboa i tha BBC-së se donte që ushtritë amerikane, evropiane dhe braziliane t’i bashkoheshin “luftës” së tij kundër bandave kriminale.
