Bëhet fjalë për modelimin, pra një studim të financuar nga Qeveria e Mbretërisë së Bashkuar, i cili trajton rritjen e shkallës së rezistencës antimikrobike (AMR) tek njerëzit në mbarë botën. Qendra për Zhvillim Global është autorja e këtij studimi, i cili arriti në përfundimin se ekonomitë e Britanisë së Madhe, Shteteve të Bashkuara të Amerikës dhe Bashkimit Evropian do të jenë ndër më të prekurat nga rritja e shkallës së përmendur.
Gazeta Guardian shkruan se ky hulumtim ka konfirmuar se qeveritë britanike dhe amerikane bënë një gabim në vendimin e tyre për të ulur ndjeshëm fondet për luftën kundër rezistencës antimikrobike jashtë vendit.
Autori kryesor i studimit dhe bashkëpunëtori i Qendrës për Zhvillim Global, Anthony McDonnell, deklaroi se rritja e shkallës së rezistencës antimikrobike mund të jetë në përputhje me vlerësimet më pesimiste për shkak të vendimit të këtyre dhe vendeve të tjera për të ulur fondet për luftën kundër rezistencës antimikrobike jashtë vendit. Ai gjithashtu ka frikë për vendet ku kjo rezistencë është nën kontroll.
“Kjo mund të rezultojë në vdekjen e miliona njerëzve në të gjithë botën, gjë që vlen edhe për vendet e G7. Investimi në trajtimin e infeksioneve bakteriale do të shpëtojë jetë dhe do të sjellë miliarda përfitime ekonomike në planin afatgjatë”, theksoi McDonnell.
Studimi llogariti barrën ekonomike dhe shëndetësore të rezistencës ndaj antibiotikëve në 122 vende. Llogaritja, në skenarin më pesimist, zbuloi se humbja vjetore e produktit të brendshëm bruto (PBB) deri në vitin 2050 do të ishte 722 miliardë dollarë në Kinë, 295.7 miliardë dollarë në SHBA, 187 miliardë dollarë në BE, 65.7 miliardë dollarë në Japoni dhe 58.6 miliardë dollarë në Mbretërinë e Bashkuar.
Sipas Institutit për Metrikat dhe Vlerësimin e Shëndetit (IHME), numri i vdekjeve nga rezistenca ndaj antimikrobikëve mund të rritet me 60 përqind deri në vitin 2050. Vlerësohet se 1.34 milion njerëz do të vdesin çdo vit në SHBA dhe 184,000 në Mbretërinë e Bashkuar për shkak të baktereve rezistente ndaj antibiotikëve. Përveç kësaj, numri i njerëzve me sëmundje të rëndë pritet të rritet.
Superbakteret rezultojnë në rritje të shtrimeve në spital, shërim më të gjatë dhe më intensiv në spital, si dhe trajtim më të shtrenjtë dhe kompleks. Trajtimi është dy herë më i shtrenjtë se trajtimi ku antibiotikët janë efektivë.
Është vlerësuar se kostoja globale e trajtimit të rezistencës antimikrobike mund të rritet në 176 miliardë dollarë në vit. Shkalla më e lartë e vdekshmërisë do të nënkuptonte gjithashtu një reduktim të fuqisë punëtore, shkruan Guardian .
