Kryeministri kinez Li Qiang njoftoi fillimin e ndërtimit të hidrocentralit më të madh në botë, i vendosur në skajin lindor të Rrafshnaltës Tibetiane, vlera e të cilit vlerësohet në rreth 170 miliardë dollarë.
Projekti është pjesë e përpjekjeve të Kinës për të zgjeruar burimet e energjisë së rinovueshme dhe për të ulur emetimet e karbonit, raportoi dje agjencia e lajmeve Xinhua e Kinës, e cituar nga Reuters. Diga, e cila do të përbëhet nga pesë hidrocentrale kaskadë, do të vendoset në rrjedhën e poshtme të lumit Yarlung Zangbo dhe mund të ndikojë në miliona njerëz në rrjedhën e poshtme të Indisë dhe Bangladeshit.
India dhe Bangladeshi shprehën shqetësim
Autoritetet nuk kanë thënë se sa njerëz do të zhvendosë projekti në Tibet ose si do të ndikojë në ekosistemin lokal, një nga më të pasurit dhe më të larmishmit në pllajë. Por sipas zyrtarëve kinezë, projektet hidroelektrike në Tibet nuk do të kenë një ndikim të madh në mjedis ose në furnizimin me ujë në rrjedhën e poshtme. Megjithatë, India dhe Bangladeshi kanë shprehur shqetësime në lidhje me digën, ashtu si shumë organizata joqeveritare.
Diga vlerësohet të ketë një kapacitet prej 300 miliardë kilovat orësh energji elektrike në vit dhe pritet të ndihmojë në përmbushjen e kërkesës lokale për energji në Tibet dhe pjesë të Kinës.
