Të paktën 20 persona u vranë dhe gati 200 të tjerë u plagosën, shumica prej tyre fëmijë, kur një avion luftarak i Bangladeshit u rrëzua mbi një shkollë në Daka gjatë një stërvitjeje rutinë.
Aeroplani, një F-7BGI i prodhuar në Kinë, u rrëzua në shkollën private Milestone në kryeqytetin e Bangladeshit, ndërsa nxënësit po përfundonin mësimet e pasdites, kanë thënë dëshmitarët.
Aeroplani goditi ndërtesën e shkollës pesëkatëshe përpara se të përplasej në një strukturë dykatëshe në kampus, duke shkaktuar një shpërthim masiv dhe zjarr.
Imazhet nga vendi i ngjarjes tregojnë gjithashtu njerëz që bërtasin dhe qajnë ndërsa të tjerët përpiqeshin t’i ngushëllonin.
Zyra e Marrëdhënieve me Publikun e Bangladeshit, e cila përfaqëson forcat e armatosura, ka theksuar se pati një defekt mekanik menjëherë pas ngritjes dhe se avioni u rrëzua disa minuta më vonë.
Lagjja Uttara, ku ndodhi aksidenti, është një pjesë me popullsi të dendur në veri të Dakës, një qytet me një popullsi prej më shumë se 20 milionë banorësh.
ISPR ka deklaruar se Forcat Ajrore të Bangladeshit kanë formuar një komision hetimor të nivelit të lartë për të përcaktuar shkakun e saktë të rrëzimit. Zyrtarët konfirmuan se piloti, toger Tawkir Islam, ishte midis të vdekurve.
