Presidenti i SHBA-së, Donald Trump, ka ndarë në rrjetin e tij social Truth Social një video të gjeneruar nga inteligjenca artificiale, ku tregohet arrestimi i ish-presidentit të SHBA-së, Barack Obama.
Videoja tregon Trumpin dhe Obamën të ulur dhe të qeshin në Shtëpinë e Bardhë, përpara se agjentët e FBI-së të hyjnë në dhomë, ta rrëzojnë Obamën përtokë dhe ta prangosin. Skena tjetër tregon Obamën duke ecur nëpër qeli me uniformën e tij portokalli të burgut. “Askush nuk është mbi ligjin”, tha Trump.
Gabbard kërcënon të ndjekë penalisht bashkëpunëtorët e Obamës
Njoftimi i Trump erdhi pasi Drejtoresha e Inteligjencës Kombëtare, Tulsi Gabbard, kërcënoi të ndiqte penalisht zyrtarët e administratës Obama, duke i akuzuar ata për kurdisje të një “komploti tradhtar” për të portretizuar fitoren presidenciale të Trump në vitin 2016 si rezultat i ndërhyrjes ruse.
Ajo paralajmëroi se Obama dhe zyrtarët e lartë në administratën e tij kishin “hedhur themelet për një grusht shteti shumëvjeçar” kundër Trump pas fitores së tij ndaj Hillary Clinton.
Fox News raportoi së fundmi se ish-drejtori i CIA-s, John Brennan, dhe ish-drejtori i FBI-së, James Comey, janë nën hetim për shkelje të dyshuara në lidhje me hetimet e kaluara qeveritare mbi pretendimet për ndërhyrje ruse në zgjedhjet amerikane.
Agjencitë e inteligjencës vlerësuan në vitin 2017 se “qëllimet e Rusisë ishin të minonin besimin e publikut në procesin demokratik amerikan, të diskreditonin Hillary Clinton dhe të dëmtonin mundësinë e saj për t’u zgjedhur dhe presidencën e saj të mundshme”.
