Arrestimi nga autoritetet e Kosovës i të ashtuquajturit zëvendësdrejtor i Zyrës për Kosovë, Igor Popoviq, dhe caktimi i paraburgimit prej një muaji, paraqet një poshtërim për regjimin e Vuçiqit dhe tregon se sa pak funksionon më Serbia si shtet,” thotë për gazetën Danas politikologu Ognjen Gogiç.
Popoviq u arrestua të premten në mbrëmje në Bërnjak, pasi paraprakisht ishte drejtuar të pranishmëve në një përkujtimore për serbët e Rahovecit. Ai i kishte quajtur pjesëtarët e UÇK-së “terroristë”, për çka edhe u ndalua dhe më pas u dërgua në njësinë e paraburgimit në Gjilan, ku iu caktua masa e paraburgimit për 30 ditë.
Prokuroria e Lartë Publike në Beograd, të hënën, ka dërguar kërkesë zyrtare Drejtorisë së Policisë Kriminale të Ministrisë së Punëve të Brendshme të Serbisë dhe Agjencisë për Siguri dhe Informim (BIA), për të identifikuar personat që më 18 korrik, duke u paraqitur si pjesëtarë të Policisë së Kosovës, arrestuan dhe dërguan në Prishtinë, Igor Popoviqin.
Presidenti i Serbisë, Aleksandër Vuçiq, të dielën, deklaroi se arrestimi i Popoviqit tregon se kryeministri në detyrë i Kosovës, Albin Kurti, ka humbur sensin dhe kërkon konflikte, porse Beogradi do të luftojë për ruajtjen e paqes dhe stabilitetit, duke paralajmëruar një reagim “të ashpër dhe të fuqishëm”.
Vetë Kurti, një ditë pas deklaratës së Vuçiqit, tha se sundimi i ligjit është themeli i Kosovës dhe se kushdo që e shkel ligjin do të arrestohet. Rasti i Igor Popoviqit nuk është përjashtim, shtoi ai.
Kërkesa e Prokurorisë së Beogradit nuk është naive për pjesëtarët e Policisë së Kosovës, sepse Serbia mund të lëshojë një urdhër arresti për ta. Fillimisht, një i tillë mund të vlejë vetëm në territorin e Serbisë, por ekziston mundësia që ai të bëhet urdhërarrest ndërkombëtar, vëren politikologu Gogiç për Danas.
“Nëse krijohen kushtet dhe bëhet urdhërarrest ndërkombëtar, kjo e rrit çmimin për Kosovën që të ndërmarrë veprime të tilla në të ardhmen. Atëherë, do të ketë më pak gatishmëri për të vepruar kështu. Nga ana tjetër, nuk e di nëse do të shkohet aq larg, sa që Serbia të tërheqë njohjen e juridiksionit të Kosovës. Me Marrëveshjen e Brukselit, Serbia në mënyrë de facto e ka njohur policinë dhe drejtësinë e Kosovës. Ky rast tregon se Serbia ndoshta nuk i njeh më këto organe, sepse thotë ‘persona që paraqiten si policë të Kosovës’, pra i konsideron si persona privatë që vetëm po hiqen të tillë”, thekson ai.
Gogiç shton se kjo mund të nënkuptojë tërheqje të plotë nga Marrëveshja e Brukselit. Ai thekson se varet sa larg do të shkojë Beogradi me këtë, duke e quajtur këtë një lojë të rrezikshme dhe një hap të rrezikshëm.
“Ose do të mbesë kështu dhe askujt s’i ndodh gjë, ose Beogradi do të fillojë të ndërmarrë masa. Është kjo për opinionin e brendshëm, por mund të ketë pasoja të mëtejshme. Nëse fillojnë të arrestojnë pjesëtarë të Policisë së Kosovës, prokurorisë apo gjyqësorit, duke thënë se ata thjesht po paraqiten si të tillë, atëherë ekziston edhe rreziku i përshkallëzimit”, paralajmëron Gogiç.
Publiku e kujton deklaratën e Vuçiqit pas vendimit për heqjen e barrikadave në veri të Kosovës në vitin 2022. Atëherë, një ish-polic i Kosovës, Aleksandar Filipoviq, i kishte thënë se nëse i heqin barrikadat, do t’i ndjekin si lepuj.
Vuçiq u kishte thënë serbëve se kërkesat janë përmbushur dhe se s’ka më nevojë për barrikada. “Nëse fillojnë dhe kapin një apo dy si lepuj, nuk do të ketë më lepuj, sepse lepujt do të bëhen ujq”, kishte thënë atëherë Vuçiq.
