Departamenti i Inspektimit pranë Inspektoratit Policor të Kosovës (IPK) ka publikuar raportin e inspektimit të rregullt në fushën e reagimit në thirrjet e qytetarëve dhe raportimit të aktiviteteve policore.
IPK njofton se ky inspektim është kryer sipas Planit Vjetor të Inspektimeve për vitin 2025, me qëllim të vlerësimit të efikasitetit dhe shpejtësisë së përgjigjes së stacioneve policore ndaj thirrjeve të qytetarëve për shqetësimet e tyre.
Objektivat kryesore të këtij inspektimi përfshijnë matjen dhe analizimin e kohës së reagimit policor, vlerësimin e procesit të raportimit të aktiviteteve policore dhe dokumentimin e tyre në nivele të ndryshme.
“Gjetjet tregojnë se treguesit statistikore të kohës së reagimit në përgjithësi nuk kanë ndryshuar ndjeshëm krahasuar me matjet e vitit 2022, me disa përmirësime në disa stacione dhe drejtoritë rajonale. Koha mesatare e reagimit në nivel vendi mbetet 13.7 minuta”, thuhet në njoftim.
Nga aspekti rajonal thuhet se, Drejtoritë Rajonale në Ferizaj, Mitrovicë Veri dhe Mitrovicë Jugut kanë treguar kohë më të shpejta reagimi krahasuar me drejtoritë e tjera.
Në raport, IPK ka dhënë katër rekomandime kryesore, duke përfshirë shtimin e kontrolleve në zyrat e radio-komunikimit në disa stacione për të përmirësuar cilësinë e Logut operacional, organizimin e trajnimeve për përmirësimin e mbajtjes së Logut operacional, nxjerrjen e një manuali operativ për procedurat dhe veprimet në menaxhimin e thirrjeve dhe analizimin e kohës së reagimit për identifikimin e faktorëve që ndikojnë në vonesat.
Ky raport është një mjet i rëndësishëm për përmirësimin e efikasitetit të strukturave policore dhe sigurisë publike në vend.
