Kryetari i PDK-së, Memli Krasniqi pas dështimit të 51-të të konstituimit të Kuvendit të Kosovës, tha se është obligim i gjithë deputetëve që të luajnë rolin e tyre karshi besimit që ua kanë dhënë qytetarëve.
“Partia e parë e ka të drejtën të propozojë kryetarin e Kuvendit, por nuk e ka të drejtën e garantuar që ta emërojë atë. E me qenë se ka kaluar 51 seanca dhe Albin Kurti dhe Vetëvendosja po e llogarisin më të rëndësishme Albulenën Haxhiun se sa rreth një milion qytetar të Kosovës që kanë votuar në zgjedhjet e 9 shkurtit. Ne jemi në këtë situatë e cila sa është absurde, është edhe e dhimbshme”, tha Krasniqi.
Kryetari i Partisë Demokratike të Kosovës (PDK), Memli Krasniqi, ka akuzuar Lëvizjen Vetëvendosje për bllokim të qëllimshëm të konstituimit të Kuvendit të Kosovës, duke e cilësuar sjelljen e kryesuesit të seancës Avni Dehari, si arbitrare dhe autoritare.
Kryetari i PDK-së ritheksoi qëndrimin e partisë së tij për të dalë nga bllokada. “Në këto tre ditët e mbetura, konform afatit që ka përcaktuar Gjykata Kushtetuese, ne jemi në qëndrimin e njëjtë – të ndërrohet kandidati dhe të sillet një nga deputetët e LVV-së që nuk ka qenë pjesë e Qeverisë Kurti. Pastaj, mendoj se mundësohet konstituimi i Kuvendit”, tha Krasniqi.
