Deputeti i Partisë Demokratike të Kosovës, Rashit Qalaj, ka kritikuar kërkesën e presidentes Vjosa Osmani drejtuar Gjykatës Kushtetuese për shqyrtimin e një mase të përkohshme që do të pezullonte rrjedhën e afatit 30-ditor për formimin e institucioneve.
Qalaj tha se një veprim i tillë i jep përparësi Lëvizjes Vetëvendosje për të vazhduar, siç u shpreh ai, me bllokimin e procesit institucional në vend.
“Unë po flas në emër personal. Mendoj që kërkesa për masë të përkohshme është e gabuar, sepse i jep kohë partisë që ka fituar më shumë ulëse – VV-së – që të vazhdojë me bllokimin e institucioneve dhe zgjedhjes së kryesisë së Kuvendit,” tha Qalaj.
Ai shtoi se presidentja është dashur të veprojë shumë më herët duke e dërguar çështjen për interpretim kushtetues.
“Presidentja është dashur që shumë më herët t’i drejtohej Gjykatës Kushtetuese. Kemi kaluar një periudhë të gjatë pa zgjidhje dhe kemi humbur muaj të tërë,” theksoi ai.
