Në kuadër të vizitës në Malajzi, zëvendësministri në detyrë i Punëve të Jashtme dhe Diasporës, Kreshnik Ahmeti, zhvilloi një takim me YB Wong Chen, Kryetar i Komisionit për Punë të Jashtme dhe Tregti Ndërkombëtare të Parlamentit të Malajzisë, si dhe me anëtarët e këtij komisioni.
Në këtë takim u diskutua për avancimin e marrëdhënieve ndërparlamentare ndërmjet Kosovës dhe Malajzisë, me theks të veçantë në rolin e diplomacisë parlamentare si një mjet për ndërtimin e partneritetit afatgjatë.
Gjatë bisedimeve, Zëvendësministri në detyrë Ahmeti, prezantoi zhvillimet e fundit ekonomike në Kosovë dhe mundësitë që ofrohen për bashkëpunim në fusha si tregtia, arsimi dhe turizmi. Palët shkëmbyen mendime edhe mbi ndikimin e zhvillimeve gjeopolitike në rajonet respektive dhe theksuan rëndësinë e dialogut të rregullt institucional për tejkalimin e sfidave botërore.
Në një takim të veçantë, Zëvendësministri në detyrë Kreshnik Ahmeti, u prit gjithashtu nga Zëvendësministri i Investimeve, Tregtisë dhe Industrisë të Malajzisë, Lieë Chin Tong.
Qëllimi i këtij takimi ishte identifikimi i hapave konkretë për rritjen e sasisë ende modeste të shkëmbimeve tregtare ndërmjet dy vendeve dhe krijimin e një baze të qëndrueshme për bashkëpunim ekonomik.
Ahmeti propozoi hartimin dhe nënshkrimin e një sërë marrëveshjesh bilaterale që do të lehtësonin bashkëpunimin në tregti dhe investime. Ai gjithashtu ftoi palën malajziane që të vizitojë Kosovën me delegacione të komunitetit të biznesit, për të hulumtuar nga afër mundësitë që ofron vendi ynë dhe si hap i parë drejt themelimit të një mekanizmi të përbashkët të bizneseve të të dyja vendeve.
“Në kuadër të vizitës, Zëvendësministri në detyrë Ahmeti, u takua edhe me Drejtorin Ekzekutiv të Korporatës të Zhvillimit Halal të Malajzisë, Hairol Ariffein Sahari, i cili prezantoi modelin funksional të vendit në fushën e certifikimit “halal” për produkte dhe shërbime të ndryshme”, njofton MPJD. /Kosovatimes/
