Sindikata e Punëtorëve të Radio Televizionit të Kosovës (SPERTK) ka lëshuar një thirrje urgjente drejtuar Qeverisë së Republikës së Kosovës që të ndërmarrë menjëherë hapat e nevojshëm për ndarjen e mjeteve financiare për RTK-në, në përputhje me buxhetin e miratuar nga Kuvendi.
Sipas SPERTK-së, transmetuesi publik gjendet në një gjendje alarmante financiare dhe çdo vonesë shtesë rrezikon jo vetëm funksionimin institucional të RTK-së, por edhe mundësinë që qindra punëtorë të mbesin pa paga, duke rrezikuar kështu mirëqenien e tyre dhe të familjeve të tyre.
“Shteti ka zgjidhje të plota ligjore për të siguruar funksionimin e RTK-së dhe për të parandaluar kolapsin e saj. RTK nuk është barrë për shtetin, por një aset shtetëror i pazëvendësueshëm”, thuhet në reagimin e Sindikatës.
SPERTK thekson se mospërmbushja e obligimeve financiare përbën një shkelje të drejtpërdrejtë të ligjit dhe rrezikon misionin kushtetues të transmetuesit publik, që përfshin informimin e drejtë të qytetarëve, përfaqësimin e të gjitha komuniteteve dhe forcimin e demokracisë në vend.
Sindikata ka vendosur afat deri më 5 gusht për realizimin e pagesave. Nëse Qeveria nuk i ndan mjetet buxhetore të parapara, SPERTK paralajmëron nisjen e protestave dhe kërkesën për pezullimin e mbulimit të çdo aktiviteti politik nga RTK. Gjithashtu, do të ndërmerren hapa ligjorë përmes padive në gjykatë ndaj të gjithë përgjegjësve institucionalë për krizën aktuale.
“RTK duhet të trajtohet me ligjshmëri, përgjegjësi dhe meritokraci – ashtu siç i takon një institucioni që i shërben interesit publik dhe të gjithë qytetarëve të Republikës së Kosovës”, përfundon deklarata e SPERTK-së.
