Një oficer i Policisë Kufitare në Dibër është pezulluar nga detyra, pasi u përfshi në një konflikt fizik jashtë shërbimit në qytetin e Vlorës.
Ngjarja ka ndodhur në ambientet e një lokali në lagjen “Pavarësia 2”, ku Nënkomisar A. I., ndodhej jashtë orarit të punës dhe në shoqërinë e një personi tjetër, kur u konfliktua fizikisht me një të ri 18-vjeçar, shtetasin A. B.
Sipas njoftimit zyrtar të Policisë së Shtetit, “Drejtori i Përgjithshëm Ilir Proda ka urdhëruar pezullimin e menjëhershëm të oficerit nga detyra, deri në sqarimin e plotë të rrethanave”.
Nga hetimet paraprake rezulton se përplasja fizike ka përfshirë më pas edhe persona të tjerë: V. B., 53 vjeç, pronar hoteli në të njëjtën lagje, si dhe shtetasin E. M. Për momentin, nënkomisar A. I. ndodhet i shtruar në Spitalin Rajonal të Vlorës.
Drejtoria e Standardeve Profesionale ka nisur ndaj tij një procedurë disiplinore të rëndë, bazuar në ligjin “Për Policinë e Shtetit”, i cili parashikon masa në raste të sjelljeve që dëmtojnë imazhin e institucionit dhe besimin e publikut.
Ndërkohë, hetimet për rastin po vijojnë nga oficerët e Policisë Gjyqësore pranë Prokurorisë, në bashkëpunim me Agjencinë e Mbikëqyrjes Policore (AMP).
