Autoritetet njoftuan se dhjetëra fluturime nga aeroporti i Moskës u anuluan sot për shkak të një sulmi kibernetik nga grupe hakerësh pro-ukrainas.
Kompania shtetërore ajrore ruse Aeroflot raportoi se 60 fluturime nga Aeroporti i Sheremetyevos u anuluan për shkak të ndërprerjeve në sistemet e IT-së. Ekspertët po punojnë për të rinisur serverat në mënyrë që trafiku ajror të mund të vazhdojë, shton Aeroflot. Kremlini i quajti shqetësuese raportet në lidhje me pezullimin e trafikut ajror.
“Kërcënimet nga hakerat përbëjnë një rrezik për të gjitha linjat ajrore kryesore”, tha zëdhënësi Dmitry Peskov. Hakerat pro-ukrainas nga grupet Silent Crow dhe Cyber Partisans BY morën përgjegjësinë për sulmin. Ata konfirmuan se përgatitjet për sulmin ndaj Aeroflot zgjatën një vit.
Trafiku ajror vendas dhe ndërkombëtar është ndërprerë
Zyra e Prokurorit të Përgjithshëm rus ka nisur një hetim për një ndërhyrje të paligjshme në sistemet kompjuterike. Mediat ukrainase raportuan për deklaratat e hakerëve në lidhje me “sulmin e tyre strategjik” ndaj Aeroflot, duke thënë se ata kishin marrë kontrollin e të gjithë infrastrukturës së IT-së dhe kishin shkatërruar 7,000 servera.
Ata gjithashtu pretendojnë se kanë mbledhur 12 terabajt të dhëna dhe se i kanë dërguar një mesazh FSB-së dhe agjencive të tjera të sigurisë kibernetike në Moskë se nuk janë në gjendje të mbrojnë infrastrukturën kritike të IT-së. Sulmi kibernetik ndërpreu trafikun ajror vendas dhe të huaj në Sheremetyevo.
