Organizata e veteranëve të luftës së UÇK-së nëpërmjet një konference për media ka bërë të ditur se më 7 gusht, do të mbajë protestë për të kundërshtuar procesin gjyqësor në Hagë.
Ata kanë thënë se protesta do të jetë me motive kombëtare, duke filluar nga ora 17:00, teksa kanë listuar tri qëllime të kundërshtimit.
Kryetari i OVL – UÇK, Hysni Gucati, ka përmendur pakënaqësinë për mosformimin e institucioneve të vendit si pikë e parë.
“Do të protestojmë ndaj Dhomave të Specializuara, të cilat po i shkelin të gjitha të drejtat e të burgosurve. Ju e dini rastin e fundit me gardianin. Ky s’është i pari, i njëjtë ka qenë një rast më herët. Janë dy raste që Gjykata Speciale përdor njerëz që dërgojnë brenda me influencë për të ndikuar në procesin gjyqësor dhe për të përgjuar e kontrolluar të gjitha dokumentacionet”, ka thënë Gucati.
“Sikur të kishim institucione që e çmojnë dhe respektojnë sakrificën, luftën e drejtë dhe të pastër, kjo Gjykatë në formën se si është ngritur do të duhej të ishte jo ekzistente”, ka thënë Xhavit Jashari.
OVL UÇK pa përgjigje nga Haxhiu për largimin e mbrojtjes së Thaçit
Kryetari i OVL – UÇK, Hysni Gucati, ka thënë se ende s’ju është përgjigjur ministrja në detyrë e Drejtësisë, Albulena Haxhiu, për kërkesën rreth sigurimit të mjeteve të nevojshme financiare për mbrojtjen juridike të të burgosurve në Hagë.
“Ne ju kemi drejtuar ministres në detyrë, Albulena Haxhiut me një shkresë që qeveria para dy vjetësh e gjysmë ka vendosur çmim tavan për mbrojtje, i cili është turp. Ne i kemi kërkuar që të jap para shtesë për mbrojtjen që të mos largohet mbrojtja për Thaçin. Siç e dini deri tani janë larguar avokati i Kadri Veselit, dy të tjerë të presidentit. Nuk kemi marrë përgjigje ende, por nuk e besoj që do të marrim”, ka thënë Gucati.
Në letrën e organizatës thuhej se shprehin shqetësimin e thellë lidhur me mungesën e mbështetjes financiare institucionale për mbulimin e shpenzimeve të mbrojtjes juridike të të burgosurve në Dhomat e Specializuara në Hagë. Sipas tyre, proceset që po zhvillohen në Hagë ndaj pjesëtarëve të UÇK-së përfaqësojnë jo vetëm individët, por edhe historinë e drejtë të luftës sonë çlirimtare.
Në ndërkohë Mbrojtja në Hagë e ish-presidentit Hashim Thaçit, sipas Fondacionit për Mbrojtjen Juridike, ka deklaruar se ka rrezik për largim. Avokati kryesor i Thaçit po pret që t`i kryhet pagesa prej mbi 2 milionë eurosh. Ndërkaq, nga Ministria e Drejtësisë kanë publikuar një sërë pagesash që kapin shifrën e rreth 33 milionë eurove të paguara deri më tash.
