Deputetja e Lëvizjes Vetëvendosje, Fitore Pacolli në magazinën “Info Plus” të RTK-së është pyetur edhe për situatën e krijuar në RTK për shkak të krizës financiare për çka mbi 700 punëtorë të RTK-së rrezikojnë të mbesin edhe pa paga nga ky muaj.
Tha se nuk është çështje me të cilën është marrë, por sipas saj, bordi e menaxhmenti i RTK-së tha se duhet të bashkëpunojnë me institucionet e të sigurohen pagat.
“Është një çështje me të cilën nuk jam marrë, mirëpo RTK e ka bordin e ka udhëheqësinë e ata duhet të kujdesën edhe duhet të bashkëpunojnë me institucionet e të sigurojnë pagat”, deklaroi ajo.
Pacolli tha se, barra nuk bie mbi ta si LVV, por mbi ata që nuk kanë ndihmuar të konstituohet Kuvendi.
“Tani ministri është në detyrë dhe akuzat iu kanë bërë ministrit që nuk mund të nënshkruaj. Nuk bie faji mbi ne, por mbi ata që nuk kanë ndihmuar që të konstituohet Kuvendi. Ligji nuk është si llastiku, ktheje nga ta kthesh e bëje ku të konvenon. Nëse është një standard që nuk mund të nënshkruaj vendime të reja, nuk mund të bëhen përjashtime. Ne vazhdojmë të krijojmë sistem të drejtë ligjor që nuk e trajton ligjin si llastiku”, tha Pacolli në “Info Plus” të RTK-së.
