Deputetja e Lëvizjes Vetëvendosje, Fitore Pacolli në magazinën “Info Plus” të RTK-së ka thënë se është sulmuar e akuzuar padrejtësisht, dhe sipas saj, asnjëri nga sulmuesit thotë se nuk kanë shkuar të paraqesin lëndën në gjykatë.
Ka thënë se sulmet që janë drejtuar ndaj saj kanë hyrë në një sferë të shkeljes edhe të bërjes së veprave penale, për çka tha se secilin sulm tashmë e ka adresuar në polici.
Pacolli thotë se është menduar, se cili mund të ketë qenë shkaku i sulmeve të njëpasnjëshme ndaj saj ditëve të fundit. Dhe sipas saj, mund të ketë qenë adresimi një keqpërdorimi mjedisor në Rrafshin e Dukagjinit.
“Kam menduar ditëve të fundit se çfarë është ajo që unë paskam bërë gjatë punës sime si deputete në Komisionin për Mjedis që ua paskam prishur interesat aq shumë. Sot po mendoja që janë dy prej tyre, e ditëve në vijim do të mendoj edhe për të tjerat se më duhet t’i gjej lidhjet. Ndalja e shkatërrimit të mjedisit e mbrojtjes së Rrafshit të Dukagjinit nga ndotja e një çimentoreje që planifikohej të ndërtohej në Klinë. Kjo ka qenë në vlerë prej 220 milion eurove dhe është pronë e Devollëve. Unë kam qenë ajo aktivisht me qytetarët e kësaj ane që e kemi ndalur”, tha Pacolli.
Gjithashtu, ajo tha se përmes komisionit të Kuvendit ku ajo ishte pjesë prishën interesa të mëdha.
“Hera e fundit kur ne kemi marr një vendim tjetër , që është një vendim shumë i madh dhe ka prishur interesa shumë të mëdha që përmes komisionit ta hetojmë tjetërsimin e pronave publike të Fakultetit Teknik dhe ish-RTP-së dhe prokuroria po heton e ka edhe arrestime në këtë drejtim”, tha tutje Pacolli në “Info Plus” të RTK-së.
Pacolli është pyetur nëse vëllai e daja i saj kanë marr grante nga Ministria e Bujqësisë në kohën kur ajo ishte në krye të Komisionit kuvendar për Bujqësi.
Tha se kush do, i ka të gjitha dokumentacionet në ministri, për çka tha se ka folur gjatë në një emision televiziv dhe ka shpjeguar gjithçka atë kohë.
Ajo u pyet edhe nëse bashkëshorti i saj ka përfituar fonde nga Ministria e Kulturës.
Tha se në kohën kur janë marrë ato mjete bashkëshorti i saj nuk ka qenë pjesë e organizatës.
“Bashkëshorti im nuk ka qenë pjesë e organizatës ka vite tani, në kohën kur janë marrë ato pare. Nuk mund të akuzohem unë për diçka që unë nuk e kam bërë, nuk kam pasur kurrfarë ndikimi”, tha Pacolli, derisa ka përmendur shumë emra që i përkasin partive të tjera politike që tha se kanë përfituar mjete si mbështetje nga Ministritë.
Pacolli ka folur edhe për moskonstituimin e Kuvednit dhe nëse Kushtetuesja mund t’ua marr mandatet deputetëve.
“Ata që po aludojnë që Kushtetuesja mund të ua marr mandatin është e paqëndrushme. Nuk ka gjykatë në botë që mund të marr një vendim të tillë. Nuk mund tua marr mandatin askush, përveç popullit”, tha Pacolli.
