Janë konfirmuar rastet e para të sëmundjes “Gjuha e Kaltër” në Kosovë, në dy ferma në fshatin Marec të Komunës së Prishtinës dhe në fshatin Brus të Komunës së Lipjanit. Agjencia e Ushqimit dhe Veterinarisë (AUV) ka njoftuar se, “pas hulumtimit të plotë diagnostik, analizat laboratorike konfirmuan prezencën e sëmundjes”.
Me qëllim të parandalimit të përhapjes, AUV ka vendosur masa të përgjithshme kufizuese të lëvizjes së kafshëve në gjithë territorin e Kosovës. “Agjencia e Ushqimit dhe Veterinarisë nga sot, ka vendosur masat e përgjithshme kufizuese të lëvizjes se kafshëve brenda territorit të Kosovës”, thuhet në njoftim.
Sëmundja “Gjuha e Kaltër” është një sëmundje virusale jo ngjitëse që transmetohet nga mushkonjat e llojit Colicoides. Sipas AUV-së, “nga kjo sëmundje preken ruminantët shtëpiak (gjedhet, delet dhe dhit). Prej këtyre më e ndjeshme është delja, pastaj dhitë dhe gjedhi”.
Theksohet se sëmundja nuk transmetohet nga kafshët te njerëzit dhe as nga kafsha te kafsha.
AUV, bazuar në Ligjin Nr. 2004/21 për Veterinarinë, ka lëshuar një “Vendim” me nr. 01/574/2025 për masat e përgjithshme për kontrollin, parandalimin dhe luftimin e sëmundjes “Gjuha e Kaltër”.
Masat kryesore përfshijnë:
“Ndalohet lëvizja e kafshëve nga fermat, tregtimi në tregjet dhe shitblerja”;
“Fermat në të cilat konfirmohet prezenca e sëmundjes, marrin statusin të infektuara dhe vendosen në masë izolimi/karantine të plotë”;
“Obligohen fermerët, që për çdo ndryshim të gjendjes shëndetësore të kafshëve menjëherë të njoftojnë veterinarin”;
“Fermerët aktivizojnë masat e biosigurisë në fermat e tyre. Të përdorin repelent/insekticide për eliminimin e mushkonjave”;
“Të përcaktohen lokacionet për groposjen e kafshëve të ngordhura”;
“AUV vazhdon me hulumtimin epidemiologjik, marrjen e mostrave dhe kryerjen e testimeve laboratorike”.
Përjashtimisht, “lejohet lëvizja e kafshëve nga fermat e lira nga kjo sëmundje deri në thertore të licencuara, me pëlqimin paraprak të inspektorit veterinar të Agjencisë së Ushqimit dhe Veterinarisë”.
Gjithashtu, “urdhërohen të gjithë menaxherët e tregjeve që nga momenti i hyrjes në fuqi të këtij vendimi të pezullojnë punën”, dhe “obligohen Policia e Kosovës, organet komunale në koordinim dhe bashkëpunim me AUV-në të bëjnë mbikëqyrjen e zbatimit të masave”.
