Pa një RTK funksionale dhe të pavarur, rrezikohet jo vetëm ekzistenca e një mediumi publik, por edhe e drejta e qytetarëve për informim të paanshëm, profesional dhe të garantuar ligjërisht.” Kështu ka deklaruar Bashkimi i Sindikatave të Pavarura të Kosovës, e cila ka dalë në mbështetje për Sindikatën e Punëtorëve të RTK-së – SPERTK dhe veprimet sindikale të saj për mbrojtjen e të drejtave të punëtorëve dhe të transmetuesit publik.
“Bashkimi i Sindikatave të Pavarura të Kosovës – BSPK, në krye me Kryetarin Prof. dr. Atdhe Hykolli, shpreh mbështetje të fuqishme dhe të palëkundur për Sindikatën e Punëtorëve të RTK-së – SPERTK, dhe për të gjitha veprimet sindikale të drejta, të ligjshme dhe të domosdoshme që ajo ka ndërmarrë e do të ndërmarrë për mbrojtjen e të drejtave të punëtorëve dhe për ruajtjen e transmetuesit publik si pasuri publike dhe shtetërore,” thuhet në deklaratën e BSPK-së.
Në komunikatë theksohet se mosalokimi i buxhetit për RTK-në deri më 29 korrik 2025 përbën një rrezik serioz për funksionimin e këtij institucioni. “Mosalokimi i buxhetit për gjashtëmujorin e dytë të RTK-së deri më 29 korrik 2025 përbën një papërgjegjësi të rëndë institucionale, duke vënë në rrezik funksionimin e transmetuesit publik dhe duke lënë pa mbështetje financiare e morale punëtorët që mbajnë në këmbë këtë institucion jetik për demokracinë dhe për informimin objektiv të qytetarëve.”
BSPK thotë se mbështet përpjekjet e SPERTK-së për të sensibilizuar opinionin dhe institucionet vendimmarrëse për situatën në RTK. “BSPK qëndron fuqishëm pranë SPERTK-së në angazhimin e saj për të sensibilizuar opinionin publik dhe për të ndërgjegjësuar vendimmarrësit se ky është një problem i thellë, i cili kërkon qartësi, zhdërvjelltësi institucionale dhe zgjidhje urgjente.”
Sipas deklaratës, heshtja e institucioneve nuk është vetëm shpërfillje e një sektori të tërë punonjësish, por cenim i të drejtave themelore të garantuara me Kushtetutë dhe me ligjet e Republikës së Kosovës.
Për protestën e paralajmëruar për 6 gusht 2025, BSPK deklaron se është një veprim legjitim dhe i nevojshëm. “Protesta e paralajmëruar për 6 gusht 2025 është një akt legjitim dhe i domosdoshëm i rezistencës sindikale, dhe BSPK u bën thirrje të gjithë anëtarëve të saj, organizatave të shoqërisë civile dhe aktorëve përgjegjës që të jenë të solidarizuar me këtë kauzë të drejtë.”
Në përmbyllje, BSPK thekson rëndësinë e unitetit dhe veprimit të përbashkët sindikal. “Në këtë moment kritik, uniteti i punëtorëve është më i rëndësishëm se kurrë. Vetëm përmes bashkimit, guximit dhe veprimit të organizuar sindikal mund të mbrojmë të drejtat tona dhe të garantojmë një të ardhme dinjitoze për të gjithë punëtorët e RTK-së dhe për vetë RTK-në si institucion.”
“BSPK është dhe do të jetë gjithmonë në mbrojtje të punëtorëve dhe të së drejtës së tyre për dinjitet, për punë dhe për pagë të drejtë,” përfundon deklarata e Bashkimit te Sindikatave të Pavarura të Kosovës.
