Ushtruesi i Detyrës së Kryeprokurorit të Shtetit, Besim Kelmendi, së bashku me udhëheqësin e Zyrës për Rikthimin e Aseteve, Bahri Hyseni, kanë vizituar Agjencinë për Administrimin e Pasurive të Sekuestruara dhe të Konfiskuara.
Sipas komunikatës për media, është diskutuar për sfidat që lidhen me administrimin e pasurive të sekuestruara dhe të konfiskuara, si dhe mbi të arriturat kryesore të deritanishme të agjencisë.
“Qëllimi kryesor i takimit ishte forcimi i bashkëpunimit ndërinstitucional për një administrim më efikas, të ligjshëm dhe transparent të pasurive të sekuestruara dhe të konfiskuara. Gjithashtu, u theksua rëndësia e parashtrimit të kërkesave në gjykatë për shitjen e pasurive të sekuestruara, me qëllim të ruajtjes së vlerës së tyre dhe garantimit të një menaxhimi sa më efektiv”, vazhdon komunikata për media.
Në takimin e përbashkët u ritheksua nevoja nevojën për një qasje të bashkërenduar dhe profesionale në funksion të sundimit të ligjit, duke ruajtur integritetin dhe vlerën e pasurisë së sekuestruar.
