Komuna e Prishtinës ka njoftuar se sot rreth orës 18:30, një kamion i peshave të rënda, me lartësi mbi kufirin e lejuar, ka hyrë në mënyrë të paligjshme në shtegun e biçikletave dhe automjeteve në tunelin te Kurrizi, duke shkaktuar dëme në pajisjet e ventilimit dhe sistemet përcjellëse.
“Kryeqyteti e dënon ashpër këtë veprim të papërgjegjshëm dhe njofton se rasti është adresuar menjëherë tek autoritetet kompetente për hetim dhe procedim ligjor”, thuhet në njoftimin e Komunës së Prishtinës në Facebook.
Komuna rikujton se “tuneli është i hapur vetëm për qarkullim të kontrolluar të automjeteve dhe kamionëve deri në 3.2 metra lartësi, dhe çdo tejkalim i këtij kufiri përbën shkelje dhe rrezik të drejtpërdrejtë për infrastrukturën dhe sigurinë publike.”
Sipas njoftimit zyrtar ky veprim ka shkaktuar:
• Shkelje të rregullave të trafikut rrugor,
• Rrezikim të sigurisë publike, veçanërisht për këmbësorët dhe çiklistët që e frekuentojnë këtë hapësirë,
• Dëmtim të pronës publike komunale, përfshirë pajisjet e ventilimit dhe sistemet përcjellëse të instaluara rishtazi gjatë këtij viti.”
