Vendet arabe, përfshirë Katarin, Arabinë Saudite dhe Egjiptin, kanë nënshkruar deklaratën ku i bëjnë thirrje Hamasit të çarmatoset dhe t’i japë fund kontrollit të tij mbi Gazën, në një përpjekje për t’i dhënë fund luftës shkatërruese në territorin Palestinez.
Shtatëmbëdhjetë vende, plus Bashkimi Evropian dhe Lidhja Arabe në deklaratën e tyre prej shtatë faqe kanë rënë dakord në një konferencë të Kombeve të Bashkuara për ringjalljen e idesë për zgjidhjen dy-shtetërore për Izraelin dhe Palestinën.
“Në kontekstin e përfundimit të luftës në Gazë, Hamasi duhet t’i japë fund sundimit të tij në Gazë dhe t’i dorëzojë armët Autoritetit Palestinez, me angazhimin dhe mbështetjen ndërkombëtare, në përputhje me objektivin e një shteti Palestinez sovran dhe të pavarur”, thuhet në deklaratë.
Teksti gjithashtu dënon sulmet vdekjeprurëse të Hamasit kundër Izraelit më 7 tetor 2023, i cili nisi edhe luftën.
Franca, e cila po bashkëkryeson konferencën me Arabinë Saudite, e quan deklaratën “si historike ashtu edhe të pashembullt”.
“Për herë të parë, vendet arabe dhe ato në Lindjen e Mesme dënojnë Hamasin, dënojnë 7 tetorin, bëjnë thirrje për çarmatimin e Hamasit, bëjnë thirrje për përjashtimin e tij nga qeverisja palestineze dhe shprehin qartë qëllimin e tyre për të normalizuar marrëdhëniet me Izraelin në të ardhmen”, tha ministri i Jashtëm Francez Jean-Noel Barrot.
Teksti, i bashkënënshkruar nga Franca, Britania dhe Kanadaja midis kombeve të tjera perëndimore, gjithashtu bën thirrje për vendosjen e mundshme të forcave të huaja për të stabilizuar Gazën pas përfundimit të armiqësive.
“Ne mbështetëm vendosjen e një misioni të përkohshëm ndërkombëtar të stabilizimit me ftesë nga Autoriteti Palestinez dhe nën kujdesin e Kombeve të Bashkuara dhe në përputhje me parimet e Kombeve të Bashkuara, duke u bazuar në kapacitetet ekzistuese të saj që do të mandatohen nga Këshilli i Sigurimit i Kombet e Bashkuara me mbështetje të përshtatshme rajonale dhe ndërkombëtare”, thuhet në deklaratë.
