Senatori amerikan Lindsey Graham paralajmëroi sot Rusinë dhe partnerët e saj tregtarë se Presidenti Donald Trump e ka seriozisht idenë e ushtrimit të presionit mbi ta për t’i dhënë fund luftës në Ukrainë.
“Për ata në Rusi që besojnë se Presidenti Trump nuk e ka seriozisht çështjen e dhënies fund të gjakderdhjes midis Rusisë dhe Ukrainës: Ju dhe partnerët tuaj së shpejti do të gaboheni rëndë. Gjithashtu, së shpejti do të shihni se Joe Biden nuk është më president”, tha ai, duke shtuar: “Uluni në tryezën e negociatave”.
Ai po i referohej ish-presidentit rus Dmitry Medvedev, i cili sulmoi Trump të hënën, duke paralajmëruar se presioni i presidentit amerikan mbi Kremlinin për luftën në Ukrainë rrezikon të provokojë një konflikt më të gjerë, jo vetëm midis Rusisë dhe Ukrainës, por edhe midis Rusisë dhe SHBA-së.
Trump shkurton ultimatumin ndaj Putinit
Medvedev tha se Trump po luan një “lojë ultimatumi” me Rusinë. “50 ditë ose 10… Duhet të mbani mend dy gjëra: Rusia nuk është Izrael, madje as Iran, dhe çdo ultimatum i ri është një kërcënim dhe një hap drejt luftës. Jo midis Rusisë dhe Ukrainës, por me vendin tuaj. Mos ndiqni rrugën e Joe-t të Fjetur”, tha ai.
“Do të caktoj një afat të ri, rreth 10 ose 12 ditë nga sot. Nuk ka arsye për të pritur. Kanë kaluar 50 ditë, doja të isha bujar, por nuk po shohim ndonjë përparim”, tha Trump në një konferencë për shtyp në Skoci.
Graham, një kritik i zëshëm i Presidentit rus Vladimir Putin dhe një kundërshtar i luftës prej kohësh, tha më parë se Kina, India dhe Brazili së shpejti do të përballen me pasoja për vazhdimin e blerjes së naftës nga Rusia dhe ndihmën e Putinit në luftën e tij të vazhdueshme në Ukrainë.
