Qytetarët e vendit, kohën e fundit, po përballen me rritje të ndjeshme të çmimeve të artikujve bazë për jetesë. Disa prej tyre vlerësojnë se me ardhjen e bashkatdhetarëve nga diaspora, çmimet po shënojnë rritje. Edhe drejtues të organizatave për mbrojtjen e konsumatorit dhe drejtues të institucioneve që mbikëqyrin rritjen e çmimeve, po vlerësojnë se aktualisht, ka rritje të çmimeve në shumicën e artikujve bazë.
Produktet ushqimore, qiratë, çmimet në kafene, restorante, madje edhe shërbimet e tjera bazike, viteve të fundit në Kosovë kanë shënuar rritje dhe janë të pa përballueshme për qytetarët. Disa qytetarë të intervistuar, i thanë Radio Kosovës se çmimet janë shumë të larta krahasuar me të ardhurat, e që sipas tyre, me ardhjen e diasporës çmimet kanë filluar të rriten edhe me shumë.
“Tepër çmimet e larta, janë të papërballueshme çmimet. Krahasim qysh i kemi pagat çmimet tepër janë të larta, edhe çdo ditë po shkojnë t’u u rritë. Llogarit ata që jetojnë me pensione, barna nuk u dalin me ble. Çmimet janë katastrofë krahasim me pagat. Bile, bile tash i kanë rritë hala që kanë ardhur mërgimtarët. E kam vërejtur në disa raste, tregtarët po e bëjnë. Shumë vështirë të jetohet në këtë kohë”, tha një qytetar.
Se çmimet janë rritur në çdo artikull e shërbime, e thotë për Radio Kosovën edhe kryetari i shoqatës “Konsumatori”, Selatin Kaçaniku. Sipas tij, aktualisht shtresa e varfër ka falimentuar si pasojë e rritjes së çmimeve dhe në rrezik është edhe shtresa e mesme.
“Ne kemi rastin e falimentimit të shtresës së varfër. Tani falimentimi për shkak të çmimeve dhe inflacionit dhe rrogave që nuk lëkunden i kanoset edhe shtresës të ashtuquajtur të mesme, e cila ka vite që jeton me overdrafte e kredi dhe nuk mund t’i përballojë të gjitha këto çmime, të cilat së fundi janë të ndikuara edhe nga çmimi i ri i energjisë elektrike”, tha Kaçaniku.
Drejtori i departamentit të Statistikave Ekonomike në Agjencinë e Statistikave të Kosovës, Ilir Berisha, i tha Radio Kosovës së çmimet e disa artikujve kanë shënuar rritje në vitet e fundit në vend, e që vetëm në qershor 2025, krahasuar me periudhën e njëjtë të vitit të kaluar, ka pasur një rritje prej 4.3 për qind. Berisha tha se ardhja e diasporës nuk ndikon shumë në rritjen e çmimeve pasi rritja e çmimeve zakonisht nuk fillon në këtë periudhë.
“Muaji qershor 2025 krahasuar me muajin qershor të vitit 2024, pati një rritje prej 4.3 për qind. Mund të ketë një efekt, por jo edhe aq sa mendohet se lëvizjet e çmimeve ndodhin vetëm e vetëm se po vijnë diaspora”, tha Berisha.
Nga ana tjetër, njohës të ekonomisë në vazhdimësi po vlerësojnë se është e nevojshme që institucionet përkatëse të ndërmarrin masa urgjente për të stabilizuar tregun dhe për të mbrojtur fuqinë blerëse të qytetarëve, veçanërisht të kategorive më të ndjeshme sociale.
