Biblioteka Kombëtare e Kosovës (BKK) ka njoftuar se ka nisur evidentimin, klasifikimin dhe organizimin e koleksionit të artit bashkëkohor që ndodhet në Bibliotekën e Arteve Bashkëkohore.
Në njoftim thuhet se ky koleksion do të jetë i gatshëm për përdorim nga studiues, artistë, studentë dhe publiku i gjerë, duke kontribuar në promovimin e trashëgimisë kulturore bashkëkohore.
Po ashtu, ka njoftuar se materialet janë në gjuhë të ndryshme, si: anglisht, gjermanisht, turqisht, kroatisht, koreanisht, tajvanisht, bullgarisht, maqedonisht, shqip etj., botime nga Evropa, Azia, Amerika, Ballkani Perëndimor
“Figura kryesore në koleksion janë: Salvador Dalí, Pablo Picasso, Jean-Antoine Watteau, Mario Sironi dhe artistë të tjerë modernë e bashkëkohorë”, ka njoftuar BKK në Facebook.
Procesi i punës po zhvillohet në tri faza: evidentimi dhe regjistrimi i materialeve me detaje të plota, klasifikimi alfabetik për lehtësimin e kërkimit dhe renditja fizike në rafte për akses të lehtë për publikun dhe studiuesit.
Qëllimi i projektit është ruajtja dhe dokumentimi i fondit ekzistues, përmirësimi i qasjes në materiale të specializuara dhe nxitja e kërkimit shkencor në fushën e artit bashkëkohor në Kosovë.
