Kryetari aktual i Komunës së Drenasit, Ramiz Ladrovci, ka vendosur t’i hyjë sërish garës për një mandat të ri në krye të kësaj komune.
Por, ai këtë herë nuk do të jetë kandidat i Partisë Demokratike të Kosovës, kryesia e të cilit subjekt politik kandidat për kryetar të kësaj komune e vendosi Petrit Hajdarin. Lladrovci e ka formuar një subjekt të ri, me të cilin do t’i hyjë garës më 12 tetor. Subjekti i ri do të quhet “Për Drenasin Kampion me Ramiz Lladrovcin (PDKRLl).
“Vendimi për zëvendësimin e kryetarit më të suksesshëm në historinë e garës për performancë komunale në Republikën e Kosovës, përmes një procedure dhe votimi të paparë deri më tani, nga Kryesia e emëruar me vendim nga vet udhëheqësi aktual i PDK-së, të zgjedhur pa iu nënshtruar zgjedhjeve të brendshme, tejkalon dhe shkel vlerat me të cilat identifikohet PDK-ja”, thuhet ndër të tjera në njoftimin e subjektit të ri PDKRLl.
Tutje thuhet se puna, përkushtimi për qeverisje të mirë, transparente e llogaridhënëse të qeverisjes lokale aktuale, vepron në papajtueshmëri me interesin qytetar ku nuk vlerësohet ndershmëria, kredibiliteti dhe integriteti i vendimeve në zbatim të ligjit, barazisë para ligjit dhe gjasave e mundësive të barabarta dhe shkel vlerat identifikuese të Partisë Demokratike të Kosovës dhe qytetarin e Drenasit, trashëgimisë më të shkëlqyer në qeverisjen lokale.
“Të motivuar nga këto shkaqe, por, duke mos i cekur të gjitha, ne të nënshkruarit më poshtë, kemi vendosur që të formojmë një subjekt të ri garues për zgjedhjet lokale, jo për t’u larguar nga PDK, por për ta mbrojtur Komunën e Drenasit dhe interesin qytetar nga degradimi i cili përpiqet të vije nga keqbërësit të lidhur me faktorë të ndryshëm, madje edhe të nivelit qendror të PDK-së. Subjekti ri do të garojë vetëm në zgjedhjet komunale për asamble dhe kryetar, me besimin se qytetarët e Drenasit do të vazhdojnë ta duan qeverisjen e mirë, pa korrupsion, bashkë më qytetarët e Drenasit e për Drenasin, jo përmes bedelëve dhe pushtetit të ndërmjetëm”, thuhet tutje në njoftim.
Ramiz Lladrovci është në krye të Komunës së Drenasit që tri mandate.
