Njësia e Komunikacionit Rrugor në Ferizaj ka ndaluar dy shoferë që po zhvillonin gara shpejtësie në rrugën Varosh–Gërlicë, duke rrezikuar sigurinë e trafikut dhe jetën e pjesëmarrësve në komunikacion, të cilët i ka gjobitur me nga 500 euro dhe ndalim 12 muaj të vozitjes.
Sipas njoftimit të policisë, shoferi B.S. (22 vjeç), me veturë BMW dhe targa të Zvicrës, u kap duke lëvizur me shpejtësi prej 192 km/h në një zonë ku kufizimi i lejuar është 60 km/h. Për këtë shkelje të rëndë, ndaj tij është shqiptuar gjobë prej 500 euro, ndalim i drejtimit të automjetit në Kosovë për 12 muaj, si dhe janë njoftuar autoritetet zvicerane, pasi ai posedon leje drejtimi të lëshuar nga Zvicra.
Shoferi tjetër, F.S. (20 vjeç), shtetas i Kosovës, u ndalua me veturë Porsche me targa të huaja, duke lëvizur me shpejtësi 185 km/h në të njëjtën zonë kufizimi. Sipas policisë, ai është dënuar me gjobë 500 euro, i janë shqiptuar 5 pikë negative dhe ndalim për 12 muaj për drejtimin e automjetit.
Matja e shpejtësisë u krye me veturën inteligjente të Policisë së Kosovës, e pajisur me radar të avancuar.
Policia Rajonale në Ferizaj i bën thirrje të gjithë shoferëve që të shmangin garat e shpejtësisë, pasi ato paraqesin rrezik serioz për jetën e tyre dhe të tjerëve në trafik. Për më tepër, policia do të rrisë masat e kontrollit dhe do të përdorë radarë në të gjitha rrugët e rajonit për të siguruar sigurinë në komunikacion.
Qytetarët ftohen të raportojnë çdo shkelje në numrin e emergjencës apo në stacionet policore përkatëse.
