Policia e Kosovës ka njoftuar për parandalimin e një rasti të shmangies nga taksat doganore, me ç’rast shtetasit të Maqedonisë së Veriut i janë konfiskuar çorapë dhe thika.
Sipas njoftimit, atij i janë gjetur në veturë 3,780 copë – çorapesh të markave të mbrojtura tregtare si Nike dhe Adidas, si dhe 47 thika gjahu me këllëfë për të cilat nuk është paraqitur asnjë dokumentacion shoqërues.
“Më datën 29.07.2025 Policia e Kosovës respektivisht njësitë patrulluese kufitare nga DRPK-Lindje (Stacioni Policor për Mbikëqyrje të Kufirit Kaçanik) në Han të Elezit kanë ndaluar një automjet të dyshuar me targa të Republikës së Maqedonisë së Veriut të drejtuar nga një shtetas i Maqedonisë së Veriut, i cili përkundër pohimit se nuk ka asgjë për të deklaruar tek zyrtarët doganorë, pas ndaljes në pikën e kontrollit, gjatë kontrollit të detajuar në bagazh janë gjetur një sasi prej prej gjithsej 3,780 copë – çorapësh të markave të mbrojtura tregtare si Nike dhe Adidas, si dhe në pjesën e përparme të automjetit (në sirtarin e pasagjerit) janë zbuluar edhe 47 thika gjahu me këllëfë për të cilat nuk është paraqitur asnjë dokumentacion shoqërues”, thuhet në njoftim.
Lidhur me rastin është njoftuar prokurori kujdestar nga Prokuroria Themelore në Ferizaj, i cili ka urdhëruar që rasti të trajtohet si “Shmangie nga taksat doganore”dhe mallrat e dyshuara konfiskohen përkohësisht dhe i dorëzohen Doganës se Kosovës, automjeti është liruar, ndërsa personi i dyshuar është liruar në procedurë të rregullt.
