Me rastin e Ditës Botërore Kundër Trafikimit të Qenieve Njerëzore, Anna Rostocka, drejtoreshë e Organizatës Ndërkombëtare për Migracionin (IOM), theksoi se edhe Kosova është prekur nga ky fenomen global. Ajo tha se vendi ynë, si shumë shtete të tjera, paraqet një vend burimi dhe destinacioni për trafikimin e qenieve njerëzore, ku viktimat mund të jenë qytetarë të Kosovës, të trafikuar brenda apo jashtë vendit.
Sipas Rostockës, rekrutimi i viktimave ndodh gjithnjë e më shpesh përmes internetit, ku kontaktet me persona të rrezikuar realizohen në mënyrë të fshehur përmes rrjeteve sociale apo platformave të tjera digjitale.
“Është detyrim i secilit prej nesh që të veprojë. Unë si përfaqësuese ndërkombëtare, ju si televizion publik, por edhe sistemi arsimor. Duhet ta rrisim vetëdijen dhe t’i nxisim qytetarët që t’i shmangin rreziqet dhe të raportojnë menjëherë kur dyshohet për trafikim, sepse bëhet fjalë për një vepër penale shumë të rëndë”, tha ajo.
Rostocka, gjithashtu nënvizoi se fenomeni i trafikimit ndonjëherë maskohet edhe përmes formave të tjera, si kërkimi i lëmoshës në rrugë.
“Nuk mund të thuhet se çdo rast është trafikim, por disa prej tyre mund të jenë të tillë dhe duhet hetuar”, shtoi ajo.
Sipas saj, kontrabandimi i qenieve njerëzore përbën një krim kundër njerëzimit dhe shkelje të rëndë të të drejtave të njeriut, me shfrytëzues që përfitojnë nga situatat e cenueshme të viktimave.
Të dhënat ndërkombëtare janë të ndryshme: raporti global i OKB-së për trafikimin e qenieve njerëzore flet për rreth 40 milionë njerëz të prekur, ndërsa Departamenti i Shtetit Amerikan raporton për më shumë se 20 milionë viktima të punës së detyruar apo të shfrytëzimit seksual komercial.
Fatkeqësisht, shumë nga këto viktima mbesin të paidentifikuara dhe pa ndihmën e duhur, duke e bërë edhe më të domosdoshëm angazhimin institucional dhe shoqëror për parandalimin e këtij krimi.
