Në dy ferma, një në Prishtinë e një në Lipjan, janë identifikuar rastet e para në Kosovë të prezencës së sëmundjes “gjuha e kaltër” te kafshët. Nga Agjencia e Ushqimit dhe Veterinarisë thonë për Radio Kosovën se kjo sëmundje nuk bartet te njerëzit, por mund të jetë fatale për kafshët. AUV tashmë ka marrë masa për parandalimin e përhapjes së sëmundjes e cila ishte e pranishme edhe vite më parë.
Sëmundja virale “gjuha e kaltër”, e cila transmetohet përmes pickimit të mushkonjave te delet dhe dhitë, është përhapur edhe në Kosovë. Prania e rasteve të para të sëmundjes e cila prek delet dhe dhitë është konfirmuar tashmë nga Agjencia e Ushqimit dhe Veterinarisë.
Sadik Heta, drejtor në Drejtorinë e Shëndetit dhe Mirëqenies së Kafshëve në AUVK, thotë për Radio Kosovën se deri tani nuk ka raste të ngordhjes së kafshëve, në fermat ku është e pranishme sëmundja.
“Kemi dy vatra të shpërthimit të sëmundjes “gjuha e kaltër”, në Komunën e Prishtinës dhe të Lipjanit, saktësisht në fshatrat Marec dhe Brusë. Kjo është një sëmundje e cila është duke qarkulluar edhe në vendet e rajonit dhe të Evropës, e fatkeqësisht edhe te ne është konfirmuar dje prezenca e kësaj sëmundjeje. Për momentin nuk kemi ngordhje, pra nuk kemi dëme ekonomike”, tha Heta.
Kjo sëmundje nuk bartet te njerëzit, por nuk rekomandohet konsumi i mishit të kafshëve që mund te jenë të prekura, thekson Heta. Ai tregon për masat që kanë ndërmarrë për parandalimin e përhapës së sëmundjes.
“Kemi marrë masat ligjore dhe profesionale të domosdoshme për parandalimin e përhapjes së sëmundjes “gjuha e kaltër”. Menjëherë kemi vendosur fermat në karantinë. Kemi bërë ndalimin e përkohshëm të lëvizjes së kafshëve, brenda dhe jashtë zonave të prekura. Kemi filluar edhe me dezinfektimin për të luftuar mushkonjat që transmetojnë virusin, si dhe po bëjmë një hulumtim epidemiologjik ”, theksoi Heta.
Agjencia e Ushqimit dhe Veterinarisë fton blegtorët që të njoftojnë rastet e dyshimta të paraqitjes së kësaj sëmundjeje si dhe groposjen e kafshëve të ngordhura në vende të sigurta. Sëmundja “gjuha e kaltër” në Kosovë ishte e pranishme edhe gjatë vitit 2015.
