Pesë persona rrezikuan të mbyteshin pasi gomonia e tyre filloi të fundosej në Gjirin e Durrësit për shkak të motit të keq. Falë ndërhyrjes së shpejtë dhe profesionale të Njësisë Policore Detare, pesë qytetarët u shpëtuan dhe ndodhen në gjendje të mirë shëndetësore.
Ngjarja ndodhi sot në mesditë gjatë një patrullimi rutinë në hapësirën detare të qarkut. Efektivët e Njësisë vëzhguan gomonen në vështirësi dhe ndërhynë menjëherë, duke i nxjerrë në breg me mjetet e tyre lundruese.
Në fund, Njësia Policore Detare u bën thirrje qytetarëve dhe turistëve që në rast nevoje të kontaktojnë menjëherë. Ata garantojnë se reagimi do të jetë i shpejtë, profesional dhe i specializuar./RTSH
