Sindikata e Punëtorëve e RTK-së (SPERTK) ka shprehur shqetësimin e thellë që edhe sot, më 31 korrik, mediumi publik mbetet pa financim, duke mbetur pa paga mbi 700 punëtorë dhe familjet e tyre.
“Kjo situatë është jashtëzakonisht e rëndë dhe krejtësisht e papranueshme për Sindikatën. Ne nuk mund të pranojmë që punëtorët e RTK-së, të cilët çdo ditë i mbajnë të informuar qytetarët e Republikës së Kosovës, të mbeten pa të ardhura për shkak të neglizhencës institucionale”, thuhet në komunikatën e SPERTK-së.
Po ashtu, SPERTK edhe një herë u bënë thirrje të gjitha institucioneve përgjegjëse të ndërhyjnë urgjentisht për të gjetur një zgjidhje për situatën dhe për të garantuar pagat e punëtorëve.
“Protesta e paralajmëruar për datën 6 gusht mbetet e pashmangshme. Ju bëjmë thirrje të gjithë kolegëve që të jenë të pranishëm dhe të bashkuar në këtë protestë”, thuhet në komunikatë.
SPERTK thotë se për protestën e 6 gushtit, të cilën e ka bërë publike edhe përmes konferencës për medie disa ditë më parë, shumë shpejt do t’i bëjnë publike pikat e veprimit dhe hollësitë organizative.
