Deputeti i Lidhjes Demokratike të Kosovës, Arben Gashi ka thënë se marrja dhe përdorimi i materialeve të prodhuara nga institucionet represive të ish-Jugosllavisë dhe më vonë të Serbisë si prova në Dhomat e Specializuara, përbën shkelje të rëndë të të drejtës për një gjykim të drejtë dhe të paanshëm.
“Këto materiale janë të fabrikuara nga një regjim kriminal, gjenocidal, i udhëhequr nga Sllobodan Millosheviqi — regjim që ka ushtruar dhunë sistematike, gjenocid dhe spastrime etnike në Kosovë dhe rajon. Të përdoren këto dokumente si “prova” në gjykata kundër qytetarëve të Kosovës është jo vetëm kundër drejtësisë, por edhe kundër çdo parimi themelor të shtetit ligjor dhe të së drejtës ndërkombëtare”, shkroi ai.
Sipas deputetit të LDK-së, Kosova ka pasur dhe ka institucione ndërkombëtare të pranishme në terren që kanë hetuar krimet e luftës, përfshirë: Gjykatën Ndërkombëtare për Krime Lufte në ish-Jugosllavi (ICTY), Misionin e OKB-së në Kosovë (UNMIK), si dhe EULEX-in, misionin e BE-së për sundimin e ligjit.
“Institucionet kanë pasur qasje të drejtpërdrejtë në vendin e ngjarjes, kanë hetuar me standarde ndërkombëtare dhe kanë ndërtuar dosje të besueshme. Prandaj, përdorimi i dokumenteve të prodhuara nga aparati shtetëror serb është i papranueshëm dhe cenon rëndë integritetin e drejtësisë në Kosovë”, thotë tutje Gashi.
Ai ka thënë se Kuvendi i Kosovës ka përgjegjësi të veprojë. Sipas tij, duhet të nxirret ligj i posaçëm që ndalon përdorimin e materialeve nga Serbia e të amendamentohet Ligji për dhomat e Specializuara.
“Kuvendi i Kosovës ka përgjegjësi të veprojë, të nxjerrë një ligj të posaçëm që ndalon përdorimin e materialeve të prodhuara nga institucionet represive të Serbisë si prova në gjykatat vendore apo ndërkombëtare që kanë juridiksion mbi Kosovën. Të amendamentojë Ligjin për Dhomat e Specializuara, si dhe, nëse është e nevojshme, Kodin Penal dhe atë të Procedurës Penale”, shtoi ai.
Gashi i LDK-së ka thënë se Kosova ka nevojë për drejtësi të vërtetë, jo për drejtësi të manipuluar dhe të eksportuar nga Beogradi.
