Ministri në detyrë i Financave, Hekuran Murati, ka deklaruar për një rritje rekorde të qarkullimit të bizneseve në gjashtëmujorin e parë të këtij viti, duke shënuar një rritje prej 10.3 për qind. Ai thotë se kjo po ndodh pasi Qeveria ka krijuar kushte të nevojshme për zhvillimin e biznesit.
“Qarkullimi i bizneseve për gjashtë muajt e parë të vitit 2025 ka arritur në një rekord prej 10.7 miliardë eurosh. Kjo paraqet një rritje prej 10.3% krahasuar me periudhën e njëjtë të vitit të kaluar, kur kjo shifër ishte 9.7 miliardë euro. Si Qeveri jemi përkujdesur që të rrisim mbështetjen për bizneset,” ka thënë ai.
Ministri në detyrë ka përmendur disa nga faktorët që kanë ndikuar në këtë rritje të qarkullimit.
Sipas tij, Qeveria ka përmirësuar qasjen në financa përmes rritjes së kapitalit në Fondin për Garanci Kreditore; ka subvencionuar punësimin e të rinjve përmes programit Superpuna; ka subvencionuar kreditë investive; ka rritur mbështetjen për sektorin e bujqësisë; ka forcuar fuqinë blerëse të familjeve përmes rritjes së pagave, pensioneve dhe shtesave për fëmijë; si dhe ka kryer pagesat ndaj bizneseve me kohë dhe pa vonesa.
“Këto shifra zyrtare janë dëshmia më e mirë që përgënjeshtrojnë pretendimet e pavërteta që shpesh na bie t’i dëgjojmë nga disa portale apo studio televizive,” ka theksuar Murati.
