Prokuroria Speciale njofton se i pandehuri M.A pranon fajësinë për dhunën ndaj KFOR-it dhe Policisë së Kosovës në Zveçan.
I pandehuri M.A ka pranuar fajësinë për përfshirjen në aktet e dhunës ndaj ushtarëve të KFOR-it dhe pjesëtarëve të Policisë së Kosovës, gjatë protestës së mbajtur më 29 maj 2023 në Komunën e Zveçanit.
Prokuroria Speciale e Republikës së Kosovës e ka akuzuar M.A për disa vepra penale, përfshirë:
Sulm ndaj personit zyrtar, Pjesëmarrje në turmë që kryen vepër penale – huliganizëm, Blerje, posedim, shpërndarje dhe shitje të paautorizuar të narkotikëve, substancave psikotropike dhe analoge, Posedim të paautorizuar të armëve.
Pas ngritjes së aktakuzës, Gjykata Themelore në Prishtinë ka aprovuar marrëveshjen për pranimin e fajësisë të arritur ndërmjet Prokurorisë dhe të pandehurit, duke e dënuar atë me 4 vjet e 11 muaj burgim efektiv si dhe me një gjobë prej 20 mijë eurosh.
