Serbia ka ndaluar një tjetër qytetar të Kosovës në pikën kufitare Batrovci, në kufirin mes Kroacisë dhe Serbisë. Bëhet fjalë për Behar Preniqin, për të cilin autoritetet serbe pretendojnë se ka qenë pjesëtar i Ushtrisë Çlirimtare të Kosovës.
Ministria e Punëve të Jashtme dhe Diasporës (MPJD) ka bërë të ditur se ka njoftuar të gjitha misionet diplomatike për këtë rast, duke e cilësuar ndalimin si një akt tjetër represiv të Serbisë ndaj qytetarëve të Kosovës.
“Rasti i fundit i arrestimit të qytetarit Behar Preniqi përbën një tjetër dëshmi të qartë të praktikave të papranueshme dhe destruktive të autoriteteve serbe, të cilat bien në kundërshtim me të drejtën ndërkombëtare dhe standardet themelore për mbrojtjen e të drejtave të njeriut”, thuhet në komunikatën e MPJD-së.
Ministria thekson se nëse ndaj Preniqit vendoset masa e paraburgimit dhe iniciohet procedurë penale, Zyra Ndërlidhëse do të ndërmarrë hapat e nevojshëm për të kërkuar një vizitë zyrtare në vendin e ndalimit.
Po ashtu, MPJD i ka bërë thirrje Bashkësisë Ndërkombëtare që të reagojë fuqishëm ndaj këtyre veprimeve të Serbisë, të cilat po cenojnë lirinë e lëvizjes dhe të drejtat themelore të qytetarëve të Kosovës.
Ndërkohë, kryeministri në detyrë, Albin Kurti, gjatë një takimi me bashkatdhetarë, u ka bërë thirrje atyre që të shmangin udhëtimet dhe kalimet transite përmes territorit të Serbisë, për shkak të rrezikut për ndalime dhe arrestime arbitrare.
“E kemi një kojshi të keq”, tha Kurti, duke i paralajmëruar bashkatdhetarët për rrezikun në rritje nga autoritetet serbe.
Njohës të çështjeve të sigurisë i kanë vlerësuar këto ndalime si veprime të rrezikshme dhe shqetësuese.
Fatmir Çollaku, njohës i sigurisë, tha se ky është veprim arbitrar dhe se nuk ka të bëjë fare me drejtësinë apo me ndonjë standard demokratik.
“Janë veprime të turpshme ndaj qytetarëve të thjeshtë që e përdorin atë rrugë si më të shkurtër. Mjafton vetëm një ditë e privuar padrejtësisht nga liria, dhe shumë nga të ndaluarit nuk kanë përfunduar mirë. Serbia nuk udhëhiqet nga parime demokratike apo të së drejtës, por nga qëllimi për t’i shkaktuar dëm qytetarëve dhe shtetit të Kosovës”, tha Çollaku.
MPJD dhe institucionet tjera relevante thonë se do të vazhdojnë angazhimin për mbrojtjen e qytetarëve kosovarë dhe garantimin e të drejtave të tyre, kudo që ndodhen.
