Për herë të parë në Kamenicë është mbajtur “Dita e Nderimit”, një aktivitet solemn ku institucionet komunale nderuan familjet e dëshmorëve, pjesëtarët e UÇK-së dhe Policisë së Kosovës të rënë në detyrë, si dhe qytetarë që kanë kontribuar në fusha të ndryshme në shërbim të komunitetit.
Në Kamenicë për herë të parë u organizua aktiviteti “Dita e nderimit” në kujtim të atyre kontribuuan për liri, siguri dije dhe humanizëm.
Para të pranishmëve, Kadri Rahimaj, kryetar i Kamenicës, tha se nderimi për këto personalitete është detyrë morale dhe kujtese historike për gjeneratat që do të vijnë, ndërsa çmimi “Metush Krasniqi” dhe “Emblema e Kamenicës”, tha se janë çmime të rëndësishme për kontribuues të kësaj ane në fusha të ndryshme.
“Komuna e Kamenicës po institucionalizon për të treguar se ne nuk kemi luksin të harrojmë. Ne kemi detyrimin ta bartim kujtesën, ti edukojmë brezat me shembuj, jo vetëm me fjalë dhe shembujt tanë janë të gjallë ata janë në historinë tonë , në rrugën tonë në flamurin tonë”, tha Rahimaj.
Zëvendësministri në detyrë i Mbrojtjes, Shemsi Syla, vlerësoi se mirënjohjet janë simbol kujtese që nuk shuhen dhe falënderim për ata që ranë dhe kontribuuan për liri të vendit.
“Përgëzoj kryetarin e komunës, drejtoritë dhe të gjithë drejtorët të cilët kanë bërë shumë që të jenë shumë më afër vlerave të luftës, të jenë afër vlerave të çmueshme të gjitha periudhave edhe krijuese edhe vlerave të tjera të kësaj pjese”, tha Syla.
Me këtë rast u promovua edhe libri i dalë nga konferenca shkencore “Kamenica në rrjedha të historisë”.
