Kryetari i Partisë Demokratike të Kosovës (PDK), Memli Krasniqi, ka pritur në selinë e partisë Përfaqësuesin e Posaçëm të Bashkimit Evropian për Dialogun Kosovë–Serbi, Peter Sorensen, me të cilin ka diskutuar për zhvillimet politike në vend, integrimin evropian dhe situatën në kuadër të dialogut me Serbinë.
Përmes një postimi në Facebook, Krasniqi ka theksuar se Kosova ka nevojë urgjente për avancimin e procesit të integrimit në Bashkimin Evropian dhe për largimin e masave ndëshkuese, të cilat, sipas tij, po dëmtojnë padrejtësisht qytetarët e vendit.
“Theksova nevojën urgjente për avancimin e integrimit evropian të Kosovës dhe largimin e masave ndëshkuese që padrejtësisht po dëmtojnë qytetarët tanë”, ka shkruar Krasniqi.
Ai ka ngritur gjithashtu shqetësimin për arrestimet arbitrare të qytetarëve të Kosovës nga autoritetet serbe, duke i cilësuar ato si veprime që minojnë përpjekjet për paqe dhe stabilitet në rajon.
“Të dërguarit të BE-së i shpreha shqetësimin për arrestimet arbitrare të qytetarëve të Kosovës nga Serbia, si dhe për ndikimin negativ që këto veprime kanë në përpjekjet për paqe dhe stabilitet”, shtoi ai.
Kryetari i PDK-së gjithashtu ka theksuar rëndësinë e themelimit të institucioneve të reja dhe legjitime pas zgjedhjeve të parakohshme, si një parakusht për kthimin e besimit të qytetarëve dhe funksionimit demokratik të shtetit.
“Vetëm atëherë, procesi i dialogut mund dhe duhet të marrë drejtimin e duhur, përmes një qasjeje të drejtë, të koordinuar dhe me njohjen reciproke në qendër të marrëveshjes përfundimtare”, u shpreh ai.
Në fund të deklaratës, Krasniqi konfirmoi se PDK mbetet e përkushtuar ndaj rrugës evropiane të Kosovës, reformave demokratike dhe vlerave euroatlantike, duke shprehur mirënjohje për rolin e BE-së në këtë proces.
