Në vitin e ri, punëtorët sllovenë do të jenë në gjendje të zgjedhin midis pushimit të së premtes, një fundjave të zgjatur ose një dite pune gjashtë-orëshe.
“E premtja pushim, fundjavë e zgjatur ose gjashtë orë punë në ditë. Punëtorët që janë mbi 58 vjeç ose kanë punuar për 35 vjet tani do të jenë në gjendje të bien dakord për një javë të tillë pune me punëdhënësit e tyre”, shpjegoi Sekretari i Shtetit i Ministrisë së Punës Dan Juvan në një postim në rrjetet sociale.
Është një sistem i quajtur “80-90-100” nga ministria, që do të thotë se punëtorët do të punojnë 80 përqind të kohës së punës, do të marrin 90 përqind të pagës për të dhe do të kenë të mbuluara 100 përqind të kontributeve.
Ky opsion do të jetë në dispozicion të punëtorëve nga 1 janari i vitit të ardhshëm, dhe ligji që e mundëson këtë është miratuar tashmë, shkruan sllovene Svet24.
Nisma synon të përmirësojë kushtet e punës dhe produktivitetin e punonjësve, veçanërisht atyre mbi 58 vjeç ose me 35 vjet përvojë pune. Dispozitat e ligjit të ri, i cili është miratuar tashmë nga Asambleja Kombëtare, do të hyjnë në fuqi më 1 janar të vitit të ardhshëm.
Disa vende evropiane tashmë po eksperimentojnë me orare pune më fleksibile dhe më të shkurtra. Midis tyre janë Suedia, Finlanda, Islanda dhe Holanda, të cilat kanë rezultuar jashtëzakonisht të suksesshme. Edhe pse orari gjashtëorësh i punës nuk është ende një normë ligjore për të gjithë në asnjë vend të Bashkimit Evropian, kompanitë individuale dhe institucionet publike e përdorin atë.
Një nga përfitimet kryesore është rritja e produktivitetit. Orët më të shkurtra të punës shpesh çojnë në përqendrim dhe efikasitet më të mirë në punë, sepse punonjësit i përfundojnë detyrat më shpejt nëse e dinë se kanë më pak kohë në dispozicion.
Orari më i shkurtër i punës gjithashtu zvogëlon stresin dhe lodhjen. Punonjësit kanë më shumë kohë për pushim, familje, sport dhe aktivitete të tjera personale, gjë që kontribuon në një ekuilibër më të mirë midis punës dhe jetës. Kjo do të thotë më pak lodhje, më pak leje mjekësore, shëndet më të mirë mendor dhe kënaqësi më të madhe të përgjithshme.
