Agjencia e Menaxhimit Emergjent (AME) ka njoftuar për situatën me zjarret në vend për sot brenda 6 orëve (8:00 – 14:00).
Në një njoftim në “Facebook”, Agjencia bën me dije se, sipas raporteve të pranuara nga Qendrat Operative 112 dhe në Qendrën Operative të Agjencisë, gjatë periudhës raportuese janë regjistruar gjithsej 23 vatra zjarri në vend, prej tyre 11 janë aktive dhe 12 janë lokalizuar.
“Situata po menaxhohet në koordinim të plotë me Njësitë Profesionale të Zjarrfikjes dhe Shpëtimit, Qendrat Operative 112 dhe Qendrën Operative të Agjencisë”, thuhet në njoftim.
Po ashtu thuhet se AME – NJPZSH mbeten në gatishmëri të lartë për të reaguar dhe për t’u përgjigjur në çdo situatë kur kërkohet.
Tutje Agjenica u bënë thirrje të gjithë qytetarëve të tregojnë kujdes të shtuar, të shmangin çdo veprim që mund të shkaktojë zjarr dhe të raportojnë menjëherë çdo vatër në numrat emergjentë 112, 193, 192.
“Agjencia falënderon zjarrfikësit për përkushtimin e tyre të palodhshëm, Policinë e Kosovës për mbështetje, si dhe të gjithë qytetarët për bashkëpunimin”, thuhet tutje në njoftim.
