Ministria e Kulturës, Rinisë dhe Sportit dhe Komuna e Podujevës kanë nënshkruar sot Memorandumin e Bashkëpunimit, përmes të cilit do të realizohet një investim prej 2 milionë eurosh për renovimin e Stadiumit të Qytetit, njofton MKRS.
“Ky projekt madhor synon modernizimin e plotë të infrastrukturës sportive, duke krijuar kushte më të mira për sportistët, klubet dhe komunitetin lokal. Punimet do të zhvillohen sipas standardeve bashkëkohore të arkitekturës dhe inxhinierisë, duke e kthyer stadiumin në një hapësirë funksionale, të sigurt dhe bashkëkohore”, thuhet në njoftim.
Projekti, ndër të tjera, parasheh ndërtimin e tribunës lindore, vendosjen e mbulesës në tribunat ekzistuese dhe ndriçimin e stadiumit “Zahir Pajaziti” në Podujevë.
“Ky investim përfaqëson një hap të rëndësishëm në mbështetjen e sportit dhe zhvillimit të aktiviteteve sportive në Podujevë, si pjesë e përkushtimit të MKRS për përmirësimin e infrastrukturës sportive në gjithë vendin”, thuhet tutje në njoftimin e MKRS-së, teksa bëhet e ditur se memorandumi u nënshkrua nga Sekretari i Përgjithshëm i MKRS, Bislim Bislimi, dhe Kryetari i Komunës së Podujevës, Shpejtim Bulliqi.
