Juristi Marash Logu ka reaguar pas publikimit të sqarimit të Ministrisë së Ekonomisë, Kulturës dhe Inovacionit (MEKI) që konfirmon pretendimin që kanë ngritur përfaqësuesit e News24 gjatë gjithë ditës së sotme se pasuria nr. 10/304, Zona Kadastrale 8170, është marrë me qira deri në vitin 2033, nuk ka qenë objekt i vendimeve gjyqësore dhe nuk i është kaluar në pronësi shoqërisë “KAYO” sh.a. Pikërisht mbi këtë pasuri janë studiot dhe redaksia e News24.
Atëherë si shpjegohet që megjithëse Panorama Group sh.a., ka një kontratë të vlefshme deri në vitin 2033, e cila nuk ka qenë objekt i asnjë shqyrtimi gjyqësor dhe nuk i është kaluar shoqërisë “KAYO” sh.a., administratori i kësaj shoqërie famëkeqi Ardi Veliu dhe Policia e Shtetit nxjerrin nga godina gazetarët, ndërpresin sinjalin dhe sekuestrojnë pajisjet.
Mos vallë Ardi Veliu dhe Policia e Shtetit janë kaq injorantë ligjorë sa nuk kuptojnë diferencën ndërmjet dy pronave të ndryshme dhe gjendjes juridike/faktike të tyre? Në fakt nuk do të ishte çudi edhe sikur të ishte kështu dhe imagjinoni pak kur çështja të shkojë në tribunalet ndërkombëtare sa qesharakë do të duket shteti shqiptar që ka zyrtarë që nuk arrijnë të dallojnë një gjë kaq bazike.
Por, të mendosh që kjo është thjesht një ngatërresë nga militantë që nuk kuptojnë as ligjin e as dokumentet është të tregohesh naiv. Në fakt “ngatërresa” vjen për shkak të urdhërit politik për të mbyllur median më të madhe informative në vend për shkak të andrallave që gazetarët e saj me integritet dhe profesionalizëm i krijojnë autokratit të Tiranës që ëndërron anëtarësimin e shpejtë në klubin Putin–Erdogan”, thotë avokat Marash Logu.
