Të paktën dhjetë persona kanë vdekur në përmbytjet e mëdha në Kinën veriperëndimore, ndërsa 33 të tjerë rezultojnë të zhdukur, njoftoi agjencia shtetërore e lajmeve Xinhua, duke cituar autoritetet lokale.
Shirat e vazhdueshëm, të cilët filluan të enjten në mbrëmje, shkaktuan përmbytje të menjëhershme në Qarkun Yuzhongu, Provinca Gansu. Deri në mesditë sipas kohës lokale, pjesë të Yuzhong kishin marrë rreth 220 milimetra ujë të premten, sipas qeverisë provinciale.
Xinhua raportoi se tetë fshatra vendas u prekën rëndë dhe se përmbytjet dëmtuan infrastrukturën, duke përfshirë rrugët dhe furnizimin me energji elektrike. Në total, u shpëtuan rreth 10,000 njerëz. Autoritetet kanë lëshuar nivelin më të lartë të paralajmërimit për rrëshqitje të mundshme të dheut, raportoi agjencia.
Edhe pjesë të tjera të Kinës po përballen me pasojat e stuhisë. Në qytetin jugor kinez të Guangzhou-t, shtatë persona humbën jetën të mërkurën kur një rrëshqitje dheu e shkaktuar nga përmbytjet varrosi shtëpitë në distriktin Baiyun. Javën e kaluar, të paktën 60 persona humbën jetën në Pekin dhe përreth tij si pasojë e shirave të rrëmbyeshëm.
