Një familje me katër anëtarë që jetonte në Mbretërinë e Bashkuar ka humbur jetën në një aksident të rëndë me makinë, ndërsa ishin me pushime në Portugali. Dy persona të tjerë, përfshirë të dashurën 19-vjeçare të njërit prej djemve, u vranë gjithashtu në aksident, raporton Sky News .
Domingos Serrano, 55 vjeç, gruaja e tij Maria Serrano, 51 vjeç, dhe djemtë e tyre binjakë 20-vjeçarë, Domingos dhe Afonso, u vranë kur makina në të cilën ndodheshin u përplas me një automjet tjetër në qytetin Castro Verde në Portugalinë jugore. E dashura 19-vjeçare e njërit prej djemve dhe shoferi 26-vjeçar i makinës tjetër vdiqën gjithashtu në aksident, konfirmuan zyrtarët lokalë.
Familja Serrano jetonte në Thetford të Anglisë, por nuk ishin shtetas britanikë. Sipas autoriteteve, ata po udhëtonin për “pushimet e tyre të zakonshme dhe të merituara”.
Bashkia shpalli dy ditë zie.
Autoritetet e Mourão shpallën dy ditë zie dhe lëshuan një deklaratë. “Makina mbante katër pasagjerë, me origjinë nga Mourão, dhe një grua të re me lidhje familjare. Banorët e Anglisë po udhëtonin nga Faro në Mourão, në pushime të zakonshme dhe të merituara. Me keqardhje të madhe Bashkia njofton këtë informacion, duke shprehur ngushëllimet e saj për familjet dhe miqtë e viktimave”, thuhet në deklaratë.
“Do të lërë një boshllëk të madh”
Klubi i Futbollit Rinor Thetford Town gjithashtu i bëri homazhe familjes, duke konfirmuar se vëllezërit binjakë luajtën për ekipin e tyre. “Klubi i Futbollit Thetford Town dëshiron të shprehë ngushëllimet e tij të sinqerta familjes Serrano dhe komunitetit lokal portugez pas tragjedisë së fundit gjatë pushimeve të tyre”, postuan ata në Facebook.
“Afonso dhe Domingos ishin pjesë integrale e ekipit tonë U18 në vitet e fundit, të dy vëllezërit ndërruan jetë tragjikisht në Portugali me prindërit dhe miqtë e tyre në një aksident tragjik me makinë. Humbja e kësaj familjeje të mrekullueshme do të lërë një boshllëk të madh në komunitetin lokal”, shtuan ata.
