Federata e Futbollit e Kosovës ka bërë të ditur se mbrëmë, në Kampin Nacional në Hajvali, janë zhvilluar testet fizike për gjyqtarët e Superligës dhe Ligës së Parë, nën përkujdesjen e Komisionit të Gjyqtarëve.
Testet janë zhvilluar sipas standardeve ndërkombëtare dhe u monitoruan nga eksperti atletik i FIFA-s, Simon Breivik, si dhe përgatitësi atletik i gjyqtarëve në Kosovë, Enver Tahiraj.
Sipas FFK-së, nga 57 gjyqtarë pjesëmarrës, 23 kryesorë dhe 34 asistentë, 47 i kanë kaluar me sukses testet, ndërsa tre gjyqtarë kryesorë dhe shtatë asistentë nuk i plotësuan normat dhe do t’i nënshtrohen ritestimit. Deri atëherë, ata nuk do të delegohen për të ndarë drejtësinë.
Punën e gjyqtarëve e ndoqi nga afër edhe presidenti i FFK-së, Agim Ademi, ndërsa aktiviteti ishte pjesë e seminarit treditor që ka për qëllim vlerësimin e gjendjes fizike të gjyqtarëve para edicionit të ri.
Kryetari i Komisionit të Gjyqtarëve, Përparim Hasani, tha se ky seminar mbahet çdo vit nën ombrellën e FIFA-s dhe se gjyqtarët e përgatitur nuk e kanë problem testin fizik. “Unë dhe komisioni jemi të kënaqur. Besoj shumë në këta djem. Na pret një edicion me ndeshje të forta, por besoj se do t’ia dalim mbanë”, u shpreh Hasani.
Ndërkaq, eksperti i FIFA-s, Simon Breivik, vlerësoi progresin e gjyqtarëve kosovarë, duke kujtuar se para gjashtë apo shtatë vjetësh situata ishte ndryshe. “Tani zhvillimi është shumë më profesional. Në mëngjes bëmë matjet e dhjamit trupor dhe të gjithë gjyqtarët janë në formë shumë të mirë. Çdo vit përqindja e atyre që kalojnë testin është në rritje”, tha ai.
Seminari për gjyqtarët mbyllet sot me pjesën e fundit teorike.
