Forcat ukrainase kanë çliruar fshatin Bezsalivka, i cili ndodhet përgjatë kufirit shtetëror me Rusinë në Oblastin Sumy, njoftoi Shtabi i Përgjithshëm i Forcave të Armatosura të Ukrainës, shkruan The Kyiv Independent . Ky lajm vjen në një kohë kur Rusia është përpjekur të depërtojë më thellë në rajonin Sumy për më shumë se dy muaj, pasi hapi një front të ri në verilindje të vendit.
Në deklaratë thuhej se 18 ushtarë rusë u “eliminuan” gjatë operacionit, megjithëse Kyiv Independent nuk ishte në gjendje ta konfirmonte në mënyrë të pavarur këtë informacion.
Fshati Bezsalivka ndodhet rreth tridhjetë kilometra në perëndim të zonës së luftimeve të ashpra në Sumy Oblast, ku forcat ruse kanë arritur të përparojnë deri në 30 kilometra nga qendra rajonale, qyteti i Sumy. Sipas Shtabit të Përgjithshëm, Regjimenti i 33-të Sulmues dhe Batalioni i 24-të Sulmues morën pjesë në çlirimin e fshatit.
Intensifikimi i luftimeve në zonat kufitare pasoi tërheqjen e forcave ukrainase nga territori që ata kontrollonin në Oblastin fqinj rus Kursk, të cilin e pushtuan gjatë një inkursioni të papritur ndërkufitar në verën e vitit 2024.
Kujtojmë se gjatë majit dhe qershorit, forcat ruse bënë përparim të konsiderueshëm në rajonin e Sumy-t, menjëherë pasi Presidenti rus Vladimir Putin urdhëroi krijimin e një “zone tampon sigurie” përgjatë kufirit me Ukrainën.
Mbrojtja në zonë u stabilizua gjatë qershorit dhe deri në fund të korrikut, forcat ukrainase arritën t’i shtynin trupat ruse nga disa vendbanime më të vogla.
