Avokati Arbër Jashari tha se është për keqardhje sjellja aspak dinjitoze dhe krejtësisht prej burracaku e zyrtarit serb Igor Popoviq, si dhe përpjekjet e tij të dëshpëruara për të shtrembëruar një realitet që e ka parë e gjithë bota.
“Sa ishte në Kosovë, Popoviq — nga frika që të përballej deri në fund me organet e drejtësisë për veprën penale “Nxitja e percarjes…” — nënshkroi marrëveshjen për pranim të fajësisë me Prokurorin Special. Të njëjtën e konfirmoi para Gjykatës, pa asnjë vërejtje apo kundërshtim. Por, sapo kaloi kufirin e Kosovës, filloi të bëjë trim, duke deklaruar se nuk i vjen pishman për deklaratat e tij inkriminuese. Më tej, edhe Ministria e Drejtësisë e shtetit të tij i doli në mbështetje, duke thënë se gjoja marrëveshja nuk prodhon efekt juridik në rendin juridik të Serbisë, as në të drejtën ndërkombëtare, dhe se kinse ishte lidhur nën detyrim dhe në kushte të shkeljes së të drejtave themelore. S’do mend që deklaratave të tilla, në radhë të parë, nuk u besojnë as vetë zyrtarët serbë, të cilët më mirë se kushdo tjetër e dinë realitetin faktik dhe juridik në Kosovë: e dinë që Kosova është shtet i pavarur dhe se ushtron kontroll të plotë juridik dhe faktik në tërë territorin e saj, përmes institucioneve të veta legjitime.Të tilla deklarata janë vetëm për konsum politik tek opinioni serb, edhe pse vetë e dinë se këto gjëra më nuk pinë ujë, madje as te ata”, shkroi në Facebook, Jashari.
