Nga Rasim Smajlaj –
Në çdo cep të botës ku valon një flamur shqiptar – qoftë në ballkonin e një banese në Zvicër, në oborrin e një shtëpie në Suedi, apo në zemrën e një emigranti në gjithë Europën, në Amerikë e Australi – atje jeni ju: mërgata jonë e dashur, krenaria jonë e heshtur dhe mbështetja jonë e pandalshme. Shqiptarët ndër vite janë detyruar të largohen nga vendlindja për arsye politike, ekonomike, apo edhe për të ndërtuar një jetë më të mirë për familjet e tyre. Por as largësia dhe as koha nuk ua kanë zbehur dashurinë për vendin. Në të kundërtën – e kanë forcuar. Kjo letër nuk është thjesht një ftesë për një ngjarje apo një takim veror. Është një thirrje e zemrës, një shenjë mirënjohjeje, dhe një ftesë për të ndërtuar ura të reja midis nesh – si ata që jetojnë në Kosovë, Shqipëri e më gjerë, ashtu edhe ata që jetojnë në diasporë, por me zemër gjithmonë në atdhe. Mërgata – më shumë se ndihmë Në kohët më të vështira historike, mërgata shqiptare ka qenë shtylla që e ka mbajtur gjallë shpresën. Nga ndihmat financiare, deri te lobimi ndërkombëtar, nga mbështetja për familjet e tyre në vendlindje, deri te investimet në shkolla, rrugë e spitale – kontributi i tyre është i jashtëzakonshëm. Jo rrallë, mërgimtari është bërë institucion më vete për fshatin apo qytetin prej nga vjen. Por ajo që shpesh harrojmë është edhe përkushtimi emocional dhe sakrifica – jetët që kanë lënë pas, mundësitë që i kanë dhënë vendlindjes, e mallin që e bartin përditë. Ftesë për njohje, bashkim dhe respekt Organizimet që po bëhen gjithandej – në fshatra, qytete e komuna – nuk janë vetëm për t’u argëtuar apo për të festuar. Ato janë mision kulturor dhe shoqëror: – Të njihen gjeneratat mes vete; – Të ruhet gjuha, tradita dhe ndjenja kombëtare; – Të falënderohet secili që ka kontribuar për të mirën e përbashkët. Në këtë frymë, kjo ftesë publike i drejtohet çdo shqiptari në diasporë: Vazhdoni të jeni pjesë e jonë. Vijeni mallin në takim me ne. Sillni buzëqeshjet, kujtimet dhe dashurinë që s’ju është shuar kurrë. Sepse, në fund të ditës, asgjë s’është më e fuqishme se një komunitet që i mban rrënjët gjallë, edhe kur degët janë shpërndarë nëpër botë. Ju falënderojmë. Ju duam. Dhe gjithmonë ju mirëpresim.
Opinioni i pavarur, nuk përfaqëson qëndrimet e Kosova Times
