Kryetari i Komunës së Prishtinës, Përparim Rama dhe ambasadorja e Vullnetit të Mirë për Kosovën në IHRC, Elvana Shala, prezantuan sot ecurinë e fushatës “Prishtina pa barriera”, një iniciativë gjithëpërfshirëse që synon përmirësimin e qasjes për personat me nevoja të veçanta dhe qytetarët me vështirësi në lëvizje.
Në konferencën e mbajtur, kryetari Rama tha se gjatë tre viteve të fundit janë ndërmarrë ndërhyrje konkrete në 22 lokacione të ndryshme në kryeqytet, ku janë instaluar rampa, janë ulur trotuaret, janë hapur hapësira të bllokuara dhe është përmirësuar ndriçimi publik.
“Kur para tre vjetësh nënshkruam memorandumin për ‘Prishtina pa barriera’, morëm një zotim të qartë: ta bëjmë kryeqytetin tonë të qasshëm dhe të barabartë për të gjithë. Sot, mund të them me bindje se ky zotim po kthehet në realitet,” deklaroi Rama.
Ai theksoi se përveç ndërhyrjeve në infrastrukturë, janë realizuar edhe fushata vetëdijesuese, është rritur inspektimi dhe është standardizuar mënyra e projektimit të hapësirave publike për të garantuar lëvizje të lirë dhe të sigurt për të gjithë.
Në disa zona, sipas Ramës, puna ka arritur deri në 90% të realizimit, ndërsa në të tjera janë në fazat fillestare, por me plan të qartë për përfundim. Ai shtoi se përpjekjet do të vazhdojnë derisa të hiqet çdo pengesë për lëvizjen e lirë në qytet.
Ndërsa ambasadorja e Vullnetit të Mirë për Kosovën në IHRC, Elvana Shala, tha se “Prishtina pa barriera” nuk është vetëm për personat me nevoja të veçanta, por edhe për të gjithë ata që hasin vështirësi në lëvizje, përfshirë të moshuarit dhe prindërit me fëmijë në karroca.
